Black Lives Matter

O fillo dun deles, un guía turístico, unha ex prostituta vietnamita, un traficante francés e un grupo de idealistas europeos dunha ONG contra minas terrestres axudaranlles na procura do tesouro. Con semellante argumento... que podería saír mal? Da 5 bloods / Spike Lee / EUA / 2019 / 154 minutos O filme comeza facendo auga na boca ao situar a acción temporal con secuencias de arquivo de persoeiros como Muhammed Ali, Malcolm X, Martin Luther King, Ho Chi Minh ou Angela Davies, mesturadas con outras das Panteras Negras, das Olimpíadas de México, revoltas, protestas, brutalidade policial, klu klux klan... e todo remexido con imaxes da Guerra do Vietnam. Un inicio prometedor no que se albisca un interesante paralelismo entre o que estaba a acontecer nos Estados Unidos de América e a propia guerra. A presentación de personaxes é bastante prometedora tamén. Os catro protagonistas reencóntranse nun hotel de Hanoi. Todo son risas e pórse ao día. Pero un deles (Delroy Lindo) seica non o leva tan ben como parece. Recoñece ser republicano e –agárrense ben– simpatizante e votante de Trump. A Guerra do Vietnam fixo verdadeiros estragos na liña de flotación do soño americano. Despois da presentación chega un pertinente flashback cunha espectacular secuencia bélica. Até aquí todo moi ben. Dunha historia con reminiscencias a Apocalypse Now mesturada cuns Space Cowboys na procura dun Tesouro de Sierra Madre, pasamos a uns tipos que van de sendeirismo pola xungla vietnamita. As pretendidas sorpresas (que se ven vir bastante de lonxe) ou os diálogos mordaces e as trampas de guión (en forma de casualidades do que podería ser un primeiro borrador) non son quen de sacar do tedio. Curiosamente, hai aquí un cambio de formato a pantalla "televisiva" como se Lee fose consciente de querer diferenciar "a parte boa" (en panorámico e outros formatos) da "menos boa" (16:9). Con todo, no desenlace final gaña moitos puntos incluíndo secuencias do movemento Black Lives Matter; pero claro, hai que chegar até aí... e as case dúas horas e media de duración, con practicamente a metade rozando o ridículo, non axudan demasiado. Da 5 Bloods non pasará á historia coma un dos mellores filmes de Spike Lee, pero si é outro gran de area no seu activismo a prol dos dereitos civís e das liberdades das e dos afroamericanos.