Antes de... ir á Antártida

Onde estás, Bernadette non só continúa con esa dinámica, senón que ademais conta cunha espectacular Cate Blanchett, que estivo nomeada aos Globos de Ouro (Mellor actriz de comedia), e cada vez está máis preto do nivel de Meryl Streep pola súa capacidade de interpretar calquera papel, e de facelo ben. Onde estás, Bernadette / EUA / 2019 / Richard Linklater / 109 minutos Nesta ocasión ponse na pel de Bernadette Fox, unha famosa arquitecta retirada cun carácter antisocial. Non lle gusta a xente en xeral, pero adora a súa filla, o seu can e o seu marido, aínda que este comece a estar algo preocupado polo estado mental da súa parella. Un día organizan unha viaxe familiar á Antártida que porá a proba a ansiedade latente de Bernadette para relacionarse con xente descoñecida, que tamén fará aflorar as razóns enquistadas da súa deriva psicolóxica e dos verdadeiros motivos do repentino abandono dunha carreira brillante para dedicarse en exclusiva á familia. Unha comedia intelixente, con fondo dramático, repleta de diálogos mordaces pero, ao mesmo tempo, dunha naturalidade e sinxeleza extremadamente difíciles de alcanzar, en gran parte, grazas a unhas personaxes (principais e secundarias) coas que é moi doado xerar empatía. Un mérito compartido entre o elenco, a dirección e un guión baseado na novela homónima de Maria Semple, novelista e guionista de series de televisión como Sensación de vivir, Ellen ou do programa Saturday Night Live (SNL). A influencia de SNL é bastante notábel, tanto pola presenza de Kristen Wiig, como polo estilo de moitas das brincadeiras, algunhas de esmendrelle total. Outro punto destacábel son os cameos e o fantástico falso documental sobre a vida de Bernadette Fox, a impresionante dirección de fotografía de Shane Kelly e un pequenísimo belisco de ciencia ficción ao estilo Black Mirror que, se ben non achega nada á historia, si engade unha capa máis nesta clase maxistral de narrativa subxugante e magnética. Cada elemento, xiro, situación, diálogo, elipse ou flash-back está distribuído na medida, tempo e momento xusto para que o público atenda á película sen pensar sequera en boquexar.