O Manual de uso de La Ribot en Compostela

As obras que fan parte da mostra están, como todo o seu labor, marcadas pola estreita ligazón da danza e as artes visuais. La Ribot. Manual de uso / Comisariada por Iñaki Martínez Antelo La Ribot / CGAC / Compostela / Até 14 febreiro 2021 La Ribot móvese entre estes dous ámbitos, e entre diferentes espazos como museos, auditorios, teatros, salas de exposicións ou feiras de arte, concibindo moitas das súas creacións para estes contextos que van propiciar obras en que un dos condicionantes principais vai ser a temporalidade. Mais o que destaca en todas as súas angueiras creativas é o que teñen de posta en cuestión, de radicalidade do discurso; o que sorprende da artista é que se mergulla no mundo da relación imaxe, música, danza, performance, unha radicalidade que non está exenta de diálogo coa tradición artística, xa que as preocupación polos roles individuais, polo corpo, pola sexualidade, a teatralidade ou polos procesos sociais, son patrimonio desta tradición. Claramente estas escollas xorden polas súas posibilidades expresivas, pola ambigüidade que ofrecen os temas ao seren reinterpretados e polo carácter de reflexiva provocación que estimulan. Un exemplo magnífico da mostra son as súas coreografías, con duracións ben variábeis que van desde apenas 30 segundos até as seis horas de Laughing Hole, unha performance que, tras a súa estrea na feira Art Basel en 2006, puido verse xa hai anos na Galiza no Museo de Arte Contemporánea (Marco) de Vigo e continúa a representarse por todo o mundo, como moitas outras das súas creacións. En xeral, o traballo de La Ribot está estruturado mediante un sistema que lle permite investigar, expandir e cuestionar os límites espaciais e temporais da danza e deixar atrás as fronteiras entre espectadores e artista. Mais, e falo desde a máis particular subxectividade, a sorpresa perante o seu traballo está especialmente na diversidade de enfoques e esta pluralidade supón un claro manifesto antitópico. Acho que foi Foucault o que dicía que non sabía moi ben o que era a liberdade, pero que percibía perfectamente o que non o era. Aplicado á mostra La Ribot. Manual de uso podiamos afirmar que, lonxe de calquera preconcepto, o que a artista nos ofrecen desde a súa ollada-outra é un exercicio de indagación aberto sobre unha das principais fontes da liberdade que é o recoñecemento do noso máis absoluto dereito á diversidade, á arte e á vida.