O kafka de Manuel Ayaso no Museo do Gravado de Artes de Ribeira

O Museo do Gravado á Estampa Dixital, situado na parroquia de Artes (Ribeira), nun fermoso espazo rural do Barbanza, é un auténtico tesouro agachado, quer polas súas coleccións de obra gráfica e bibliográficas, quer polos seus interesantes proxectos expositivos sempre ao servizo da divulgación das artes do gravado. Kafka / Comisariado: Xoán Pastor Rodríguez Santamaría / Local: Museo do Gravado á Estampa Dixital, lugar do Outeiro, Artes, Ribeira / Até o 30 de maio de 2021 Nas súas salas pódese contemplar até finais de maio unha ampla mostra da obra de Manuel Ayaso (Aguiño, 1934) que ofrece unha serie de gravados á Punta Seca que teñen como mundo referencial a obra do escritor Franz Kafka. Alén diso, o propio museo edita e incorpora á exposición unha edición única e limitada da obra gráfica do artista en estampación serigráfica. O traballo plástico de Ayaso móvese no territorio do grotesco, no amplo sentido que o termo abrangue, unhas veces esaxerado, noutras ocasións asimilado ao deforme, outras achegado ao satírico ou mesmo ao incongruente. De todas estas lecturas do grotesco participa a arte do gravador, co seu gusto polo esperpento e o híbrido, pola entroidada e a caricatura. É o seu un "grotesco" popular que afunde as súas raíces no substrato universo das camadas máis baixas da sociedade que agromara no mundo baixomedieval e comezara a ser representado na grande arte no século XIX (Gustave Courbet, Honoré Daumier...). En Ayaso estes aspectos son tamén unha forma de pintar Galiza, o seu país, só entendíbel desde os fundamentos ligados ao pobo, por medio dun variado conxunto de imaxes de bestiario irreverente e de mostruosidade escatolóxica mais tamén en escenas clásicas ou relixiosas que pasadas polo seu estilo singular acaban por conformaren un todo indistinguíbel, é dicir "un estilo". A obra gráfica de Ayaso está chea de figuras mergulladas en mundos enleados entre soños e xogos ocultos: eses seres híbridos que semellan saír dun bestiario ou das drôleries -un tipo de iluminacións decorativas nas marxes dos manuscritos que desenvolven unha escena de fantasía máis ou menos cómica, alleas ao texto dun libro miniado medieval. En non poucos gravados achamos outra das características que singularizan o seu estilo, como é a capacidade de recrear e transmitir os sentimentos e emocións humanas cunha clara suxestión erótica facendo que se respire frecuentemente unha tensión psíquica e sexual con grupos ensarillados en perigosas e extravagantes ligazóns. O mundo creado polo noso artista é, daquela, unha mestura de inocencia e perversidade, un universo recoñecíbel e que, ao tempo, pode ser posto en relación co ámbito do prohibido polo que ten de transgresor.