O barroco veneciano na Fundación Barrié

A Fundación Barrié trae a Galiza, co título de Deuses e heroes do barroco veneciano. De Tintoretto a Luca Giordano e Sebastiano Ricci, unha mostra de pintura pertencente aos fondos da Fundación Querini Stampalia de Venecia. Trátase dunha fundación que ten a súa sede na cidade italiana, no pazo da familia que lle dá nome, construído no século XVI. Foi creada en 1868 por vontade do derradeiro descendente, Giovanni, que non tiña herdeiros directos. As estancias acollen a biblioteca, o museo e unha zona de exposicións temporais e o museo conserva prezadas coleccións artísticas acumuladas pola familia ao longo dos séculos. Entre as obras que posúen hai pinturas de Giovanni Bellini, Carpaccio, Palma o Vello, Luca Giordano, Sebastiano Ricci, Giambattista Tiepolo e Pietro Longhi, alén dun bosquexo de Antonio Canova e de lenzos de Jacopo Tintoretto, Canaletto e Tiepolo propiedade do Banco Intesa Sanpaolo, depositados na fundación. Para a mostra que agora se pode contemplar na Coruña, pártese de obras que poñen o foco en temas mitolóxicos a partir de fondos fundamentalmente barrocos, un período que na arte veneciana é menos coñecido que o renacentista ou que do século XVIII, debido a que a pintura barroca veneciana, durante o século XVII, aínda que ten desenvolvementos importantes, fica escurecida polo escintilar da pintura da centuria anterior -presente na mostra coruñesa cun Tintoretto-. A pintura barroca veneciana abala so a influencia de grandes mestres como Rubens en pintores como Domenico Fetti, Strozzi ou de Luca Giordano e chega, xa a inicios do XVIII a artistas como Sebastiano Ricci. De feito, non será ate comezos do Settecento cando recupere de novo protagonismo e hexemonía no contexto artístico europeo. En xeral, o XVII veneciano é imitativo, tendo neste sentido un peso ben relevante a sombra dos grandes mestres do XVI: Tiziano, Tintoretto, Veronesse, o que leva a unha produción artística sen grandes doses de orixinalidade creativa. Con todo, como a exposición da Fundación Barrié evidencia, estamos perante grande pintura, que se insire nunha das máis senlleiras tradicións da plástica europea desde finais da Idade Media como é a veneciana, unha das escolas fulcrais no desenvolvemento da pintura europea de todos os tempos. Deuses e heroes do barroco veneciano. De Tintoretto a Luca Giordano e Sebastiano Ricci ofrece, xa que logo, unha ocasión, non moi frecuente no noso país, de contemplar pintura histórica de calidade dunha das grandes escolas da pintura universal.