Amand-Durand no Museo de Artes do Gravado de Ribeira

Nas salas do Museo de Artes do Gravado á Estampa Dixital, situado na parroquia de Artes (Ribeira, O Barbanza), pódese contemplar desde inicios deste mes, e co comisariado do seu director Xoán Pastor Rodríguez Santamaría, unha mostra que nos achega a obra de Albrech Dürer (Nuremberg 1471-1528) por medio das 108 estampas realizadas sobre as súas creacións polo gravador francés Charles Amand-Durand en 1876. Trátase de heliografías, unha técnica que utiliza a luz solar para reproducir imaxes cunha gran precisión e fidelidade, revolucionaria no seu tempo, e que o artista francés levou a niveis de altísima calidade ao aplicala á obra de mestre alemán. Dürer, auténtico xenio do gravado e a pintura, practicou diferentes técnicas de estampa: xilografía, gravado con buril e en menor medida a augaforte e a punta seca. En especial nas primeiras, a mestría técnica e conceptual chega a niveis daquela nunca atinxidos, convertendo os seus gravados en obras primas á altura de calquera técnica artística. A sona de Dürer, en realidade, débese en gran medida á súa actividade como gravador. De feito, foi recoñecido internacionalmente no seu tempo e o seu prestixio desde aquela até ben entrado o século XVII fixo que as súas estampas fosen obxecto de imitación, inspiración e copia. Como noutros ámbitos creativos, Dürer foi un coñecedor excepcional das tendencias artísticas do seu tempo, cunha obra alimentada de pulos dispares: expresionismo visionario, lirismo inxel, racionalización teórica, observación pormenorizada da natureza, sensualidade humanística e sobriedade luterana. A respecto do gravado, durante a súa etapa formativa mostrou interese especial polas estampas de Martin Schongauer, o máis famoso gravador desa altura, a quen quixo coñecer viaxando á cidade de Colmar (Alsacia). Alén diso, na viaxe inicial que fixo a Italia puido acceder a información sobre novas temáticas para o gravado. Estas innovacións, unidas ao coñecemento da práctica da xilografía da escola alemá, confluíron no desenvolvemento dunha maneira nova de concibir a arte da estampa. Grazas a uns excepcionais dotes técnicos, Dürer desenvolveu até extremos prodixiosos a linguaxe tonal do gravado en madeira, unha mestría que desenvolve con igual calidade co buril. Desde o punto de vista temático son obras que expresan o pensamento moderno do artista, que converte estas inicialmente humildes obras sobre papel en auténticos tratados do pensamento humanista do seu tempo. Un traballo ao que a versión de Charles Amand-Durand do Museo de Ribeira nos permite acceder cunha excepcional calidade.