Visitas urbanas

Os curtos días de inverno e o tempo inestábel que os acompaña as máis das veces non teñen por que ser un inconveniente para andar e ver, so é cuestión de mudar o centro de interese e o punto de destino. É certo que as poucas horas de luz dificultan as saídas longas, e o tempo afasta da idea os percorridos pola natureza na que ademais as paisaxes, a non ser en circunstancias especiais, non ofrecen o mellor aspecto; mais son unha boa época, e unha boa ocasión, para facer visitas urbanas; e non é necesario que o día sexa excepcional para deixarse ir polas rúas descubrindo os sitios e as cousas que lle dan mérito a cada localidade. Todas as cidades e moitas vilas teñen lugares polos que se poden facer e gozar recorridos atractivos de interese histórico, artístico e/ou etnográfico, percorridos que non sempre é necesario facer coa luz do día e que, en moitas ocasións, grazas á iluminación artificial, presentan un aspecto diferente que lles confire unhas características e unha presenza novas, dignas de ter en conta; tamén podemos facer unha visita por calquera outra razón que consideremos de interese (comercial, festivo...) ou ir simplemente porque a viaxe nos permita achegarnos a coñecer outras formas de ver, facer e entender o noso ser e a nosa diversidade. E se queremos seguir mantendo un punto de contacto coa natureza podemos dar unha volta polos seus parques e xardíns onde medran, aínda que fóra do seu ambiente e moitas veces domesticadas, especies vexetais menos comúns e algúns exemplares de características relevantes que os fan merecedores de atención e ou protección, (moitos dos exemplares de árbores que se recollen no catálogo de especies protexidas da Xunta da Galiza atópanse en parques e xardíns públicos e/ou privados). Moitas localidades acollen bens de interese; máis de trinta están catalogadas como Conxuntos de Interese Histórico-Artístico e case todos os concellos nos que se atopan dispoñen de puntos de información e planos con itinerarios para facer percorridos por elas con máis aproveitamento; planos aos que as máis das veces tamén se pode acceder a través da rede e que, se se baixan con anterioridade, poden ser estudados para sacarlle á visita o maior rendemento. Moitas contan con elementos singulares; e todas gozan do seu "ser", ese carácter, definíbel ou indefiníbel, que as fai diferentes e únicas. Atópanse espalladas por todo o territorio, tanto no interior como na costa, e sempre temos algunha á distancia axeitada do noso punto de partida como para que achegarse a ela non sexa necesario facer unha programación exhaustiva nin a moi longo prazo.