Val glaciar de As Lamas-Requeixo

Menos coñecidas, pero máis espectaculares, son as pegadas que o xeo do pasado deixou nas súas abas, na súa estrutura e na súa configuración actual, que o converten nunha área de grande interese xeomorfolóxico e paisaxístico, sen esquecer a gran variedade de hábitats que encerra e o importante número de especies, de características propias das alturas, con case un cento de endemismos ibéricos. Paraxe: Macizo Central | Concello: Manzaneda | Dificultade: Media | Percorrido: 16 quilómetros (ida e volta) Para gozar desta riqueza podemos facer unha camiñada polos vales glaciares de Prada e As Lamas, en Requeixo, no concello de Manzaneda, nos que se forman os regos de Lamas e Requeixo, cabeceiras do rego de San Miguel, (Bibei-Sil). Os vales glaciares de Prada e Lamas tiveron a súa orixe nas glaciacións de finais do Cuaternario, cando unha gran masa de xeo, un glaciar de plataforma, cubría a alta zona achairada da serra de Queixa e dela esvaraban linguas que cubrían distancias de até seis quilómetros. Estas linguas, no seu desprazamento, labraron o relevo da contorna, creando os típicos vales de fondo chan e deixando ao longo do seu percorrido ringleiras de morenas, grandes pedras que arrincaban das abas dos montes e arrastraban ao seu paso. Para chegarmos a Requeixo, punto de arranque da ruta, na estrada de Manzaneda a Vilariño de Conso, entre Placín e San Miguel, collemos o desvío ao lugar. Podemos ir e vir polo mesmo camiño ou facer unha circular partindo por un lado do val do río e retornando polo outro. O primeiro tramo da ruta faise por unha pista ampla, pola que se pode circular cun coche todoterreo, que remata nos prados onde conflúen os regos de Lamas e de Requeixo. Polo camiño podemos ver, dispersas polo terreo, rochas que formaron parte das morenas e, ao tempo gozar das amplas paisaxes porque, aínda que camiñamos preto do fondo do val, o espazo é tan aberto que permite gozar de amplos horizontes. Chegando ao final da pista temos dúas opcións: ir á dereita para percorrer o val de Lamas e achegarnos ao seu circo (que se atopa na aba leste de Cabeza de Manzaneda), ou seguir de fronte, onde a un quilómetro temos o lugar abandonado de Prada, desde o que podemos seguir cara ao fondo do val glaciar. O tempo que pasou desde que non se transita polos camiños fai que a vexetación os borre, polo que para achegarnos aos circos debemos buscar os espazos polos que movernos, aproveitando sempre os camiños do gando e os sitios cubertos de herba e coa vexetación de menos altura..