Río Homen e Os Carríns

Con esta ruta poderemos coñecer unha das moitas áreas de interese do Parque Nacional Peneda-Gerês -que forma un conxunto co Parque Natural galego da Baixa Limia-Serra do Xurés-, constituído desde 1997 como Parque Transfronteirizo Gerês-Xurés, e a Reserva da Biosfera co mesmo nome. Un percorrido de grande interese xeolóxico, paisaxístico e biolóxico, no que poderemos gozar de espectaculares vistas do val glaciar polo fondo do que discorre o río Homen que, no traxecto, nos ofrece numerosos saltos e fermosas pozas de augas transparentes en fondos rochosos, e dos cumes da serra; apreciar as distintas formas de erosión glaciar e fluvial, contemplar unha gran variedade de formacións rochosas, e descubrir algunhas das especies animais e vexetais propias da zona; sen esquecer aspectos etnográficos como as chivanas, construcións que servían de refuxio aos pastores, e históricos (minas de volframio). As minas dos Carrís explotaron filóns que se estenden a unha e outra beira da raia, ricos en numerosos minerais de interese entre os que destacan o volframio, o estano, o molibdeno, o cobre... Comezaron a funcionar de forma artesanal arredor de 1941, logo foron ampliadas e modernizadas e fecharon definitivamente a finais da década de 1970. En tempos da II Guerra Mundial tivo grande importancia a extracción de volframio destinado a maquinaria bélica. A ruta, sinxela no trazado, é doada de seguir, non ten perda porque segue o antigo camiño que, remontando o curso do río Homen, chega ás súas fontes máis afastadas na lagoa que se atopa ao pé da mina. Comeza na fronteira de Portela do Homen, onde hai que deixar o vehículo. Camiñando 1 quilómetro pola beira da estrada chégase á ponte de San Miguel e, despois de cruzala, cóllese, á esquerda, o camiño que remonta o curso do río que non temos que abandonar até o seu remate. A dificultade do percorrido non está nin na distancia nin no trazado do camiño, senón en ter que movernos durante unha gran parte do tempo por un leito de pedras soltas que poñen a proba a fortaleza das articulacións de pés e pernas, especialmente na baixada. As persoas con máis ganas de aventura poden cruzar a serra por Portela da Amoeira, buscando o carreiro que enlaza coa ruta da mina das Sombras, para saír a Vilameá (Lobios) ou no punto de enlace do camiño que baixa da mina das Sombras coa pista, desviarse á esquerda para saír moi preto do posto fronteirizo.