Rianxo, un litoral para gozar e aprender

Rianxo atópase na banda norte da ría de Arousa e a súa costa abrangue una parte do litoral do interior da ría e un tramo do esteiro do Ulla. É unha costa pouco exposta, con numerosos abrigos, seos e esteiros que alterna pequenas praias e rochedos de pouca altura nas que se forman hábitats de grande interese biolóxico. Unha pequena parte está incluída no LIC/ZEC Río Ulla (a zona do esteiro até a punta das Tres Cruces). Paraxe: Barbanza / Concello: Rianxo / Percorrido: 27 km (lineais en coche + camiñadas) / Dificultade: Baixa O litoral de Rianxo ten un grande interese natural (formas e hábitats), histórico-artístico (mámoas, petróglifos, castelos, castros, igrexas, cruceiros...) e etnográfico (conxuntos urbanos, peiraos tradicionais, embarcacións...). Un percorrido lineal duns 27 quilómetros que combina tramos en coche (ou en bicicleta) con pequenas camiñadas permítenos achegarnos aos puntos de maior interese. Recomendamos facelo coa marea baixa para poder apreciar a amplitude das praias, os espazos marisqueiros e os rochedos. Comezamos na Ponte Beluso (no fondo da ría de Beluso), no linde con Boiro, e seguimos a estrada xeral en dirección a Padrón para desviarnos a Taragoña, onde podemos achegarnos ao porto e á punta de Iñobre. Volvemos atrás e collemos a estrada de Rianxo desde a que nos desviamos no lugar de O Pazo para visitar, a praia da Torre, a desembocadura do río Te, a punta da Torre, o Castelo da Lúa e a praia do Pazo. Desde a praia da Torre hai un paseo acondicionado até o centro de Rianxo. A seguinte parada é a vila de Rianxo, lugar de nacemento de importantes persoeiros galegos: Castelao, Manuel Antonio e Rafael Dieste, capital do concello e centro de importante actividade na pesca de baixura (sobre todo sardiña), o marisqueo (berberecho, ameixa...) e o cultivo do mexillón. A vila conta con dous museos de interese: o Museo do Mar e a casa Museo de Manuel Antonio, que podemos visitar, ademais do porto, as igrexas… Seguimos a estrada cara a Catoira pola beira da Ría e desviámonos en Cortes para coñecer a praia de Quenxo, o pequeno porto de Cortes e a praia de Tanxil. Volvemos á estrada e desviámonos en Brión para ir á punta do Salto do Ladrón, a praia do Porrón, a punta do Castro, a praia das Cunchas e á punta Sebeira. Volvemos de novo á estrada principal e continuamos até Quintáns desde onde podemos achegarnos, por unha pista de terra, até a punta das Tres Cruces que marca o remate do esteiro do Ulla e indica o camiño fluvial Xacobeo. Volvemos atrás e seguimos pola estrada, pola beira do esteiro do Ulla, até a ponte que cruza a Catoira, desde onde hai unha boa vista do esteiro. Un pouco máis adiante, no río, atópase a illa de Bexo, compartida con Dodro, onde remata o concello de Rianxo.