A Peneda. Parque Nacional Peneda-Gerês

Un percorrido por un dos moitos lugares de interese do Parque Nacional da Peneda-Gerês, dun grande valor ecolóxico, xeolóxico e etnográfico. A serra da Peneda esténdese con dirección N-S e acada, no Outeiro Alvo, os 1.314 m de altitude. Está formada por rochas graníticas espidas, que lle dan un aspecto característico, cubertas nas partes baixas de herbas e mato, e entre as que quedan poucas árbores. Vacas da raza Barroçao, autóctona da zona. (Foto: Colectivo Xea) Achegámonos á zona desde Lamas do Mouro onde collemos o desvío á porta do Parque e uns poucos metros despois un novo desvío, á dereita, indicado como a Arcos de Valdevez por Gavieira. Baixando por el, pola estrada que é linde do parque, percorremos ao longo o val no que se atopan algunhas das fontes do río Mouro e, no cambio de vertente, as nacentes do río Pomba, e vemos un pouco despois, á dereita, a localidade de Bouça dos Homens. Aquí, no punto onde a estrada da un xiro de noventa graos á dereita para cruzar o río deixamos o coche e comezamos a andaina. Xusto antes de cruzar o río temos, á esquerda da estrada, o camiño polo que temos que ir –un dos que percorrían as xentes da Peneda para chegar á Bouça dos Homens, unha das zonas ás que levaban o gando–. Un camiño con partes empedradas que logo empeza a gañar altura para levarnos ao cambio de vertente ao pé da impresionante mole rochosa da Penameda (1.268 m). Subindo por el veremos, ao outro lado do val do río Pomba, un foxo do lobo bastante ben conservado. Foxo do lobo da Bouça dos Homens. (Foto: Colectivo Xea) Desde o cambio de vertente xa temos, ao fondo, a lagoa e sen desviarnos do camiño, sinalado con mariolas (grupos de pedras encasteladas), chegaremos a ela sen problema. A volta podémola facer polo mesmo camiño ou aventurarnos por un camiño non sinalizado e, desde a pedra grande que hai ao pé da presa, subir por carreiros do gando até acadar o cambio de vertente, desde este traxecto temos unhas fermosas vistas da lagoa, e desde o cambio de vertente unhas amplas panorámicas do conxunto da serra desde a Penameda até o Coto Alvo e veremos, un pouco abaixo, un prado fechado cun valado; temos que baixar até el e desde alí coller cara á esquerda, sen gañar nin perder altura, e polos carreiros do gando chegaremos a outro camiño que usaban os gandeiros para subir á Bouça dos Homens, que, despois dunha subida e unha boa baixada, nos conduce á estrada pola que faremos un curto tramo até o punto de partida. Desde a lagoa podemos alongar o percorrido baixando ao Santuario da Nossa Senhora da Peneda –unha forte pendente con máis de 300 m de desnivel acondicionada con escaleiras– para coñecer o lugar desde onde temos unha boa panorámica da masa rochosa da contorna e a fervenza pola que cae, ao pé do santuario, o rego que sae da lagoa. Santuario da Nossa Senhora da Peneda e fervenza. (Foto: Colectivo Xea)