O litoral de Vilaboa

O Concello de Vilaboa está situado na marxe dereita da ría de Vigo. O litoral forma parte do Seo de San Simón, e esténdese desde a punta do Aradoiro, ao pé da ponte de Rande (linde con Moaña), até a desembocadura do río Ulló (linde con Pontevedra). As principais actividades na zona son o marisqueo, a acuicultura, os servizos e a industria. Paraxe: Seo de San Simón / Concello: Vilaboa / Percorrido: 15 km (en coche) + camiñadas / Dificultade: Baixa É unha costa abrigada que alterna rochedos de pouca altura con areais e seos nos que desembocan pequenos regos que nacen nos montes do Morrazo. Está protexida no LIC/ZEC “Seo de San Simón”. Acolle numerosos lugares de interese, en especial lameiros nos esteiros, onde asentan especies adaptadas ao medio mariño de augas pouco fondas, que serven de refuxio de fauna, en especial aves (anátidos e limícolas). En moitas zonas a liña de costa está ocupada por instalacións industriais (conserveiras, depuradoras, estaleiros...) ou portuarias e por propiedades privadas, que en xeral dificultan ou impiden o acceso ao mar. Podemos facer un percorrido para coñecer os puntos máis destacados e accesibles, combinando desprazamentos por estrada con pequenas camiñadas. Se dispoñemos de tempo podemos achegarnos a moitos máis lugares, facendo a pé algúns tramos por camiños non aptos para coches como o camiño do Chan da Croa, que nos leva pola beira do mar desde Paredes a Larache. Comezamos a viaxe en Paredes collendo o desvío que leva ao peirao e á praia do Areeiro. Desde alí seguimos unha estrada que vai ata as Saíñas do Ulló, onde podemos facer un pequeno percorrido a pé para ver o seo, as saíñas e os restos do muíño de marea. Para continuar a viaxe debemos saír á estrada xeral que vai a Vilaboa, a altura do Toural, e coller á esquerda até pasar Acuña, onde temos o cruce que nos leva ao Peirao dos Caralletes, e facemos unha parada para ver as vistas do Seo de San Simón. Volvemos a estrada ata que collemos o cruce que vai a ao peirao de Santa Cristina de Cobres onde podemos ver tamén a praia de Deilán e a Pedra da Señora/da Oliveira que da nome á confraría. Desde aquí pódese facer un pequeno paseo até a praia e punta de Pereiró, onde hai una área de lecer (tamén se pode baixar co coche, pero está mal sinalizado). Seguimos agora até o desvío á praia de Riomaior, onde hai un pequeno paseo. Desde a praia de Riomaior ata o remate do percorrido so podemos seguir pola estrada, que vai ao pé da ría, da que so nos desviamos para achegarnos ao peirao de Santo Adrao de Cobres e para facer unha última parada na Punta da Travesada, onde se atopa a praia do Forno do Cal e desde onde podemos ver a punta do Aradoiro, xa debaixo do arranque da ponte de Rande, final do traxecto e do concello de Vilaboa.