O litoral de Sanxenxo

Propoñemos un achegamento en coche aos puntos máis sinalados e de doado acceso, pois para coñecer a costa devagar son precisas varias xornadas facendo camiñadas. Comezamos no interior da enseada do Umia, na ría de Arousa. Desde Vilalonga imos cara á punta da Fianteira para achegarnos á Telleira, ás puntas Arnosa e A Rasa, e ás lagoas de Roxique, creadas pola extracción de arxilas para as industrias cerámicas da zona. Podemos volver a Vilalonga ou seguir por estradas estreitas até A Revolta e o esteiro do rego dos Mouros. Paraxe: Rías de Arousa e Pontevedra | Concello: Sanxenxo | Dificultade: Baixa | Percorrido: 45 quilómetros circular, incluídos os desvíos Desde a rotonda da Lanzada, seguimos pola estrada de Pontevedra ao Grove até o aparcadoiro da Lanzada, desde onde podemos acceder á praia e punta da Lapa, ao illote Outeiriño e á praia de Area Gorda. Imos logo á Punta da Ermida onde visitamos os restos arqueolóxicos, as praias da Nosa Señora e de Foxos, e a pequena península na que están a capela románica e a torre da Lanzada. Continuamos pola estrada e desviámonos á punta Corveiro para ver os cantís, a pequena praia de Fontenla, o seo dos Fornos e seguir até a punta Faxilda, enclave de interese paisaxístico e xeolóxico. Saímos á estrada até a praia Magor, na que hai un bo sistema de dunas, e á praia Pragueira. Máis adiante desviámonos á praia de Bascuas (nudista), de interese polas dobras nas súas rochas, e despois á punta de Montalbo, desde a que hai panorámicas dos cantís e praias da contorna. De volta na estrada pasamos polas praias de Montalbo/Arra e pola punta e praia das Paxariñas para chegarmos ao desvío á punta de Cabicastro. Logo volvemos para desviarnos á praia de Canelas e despois, buscando as rúas máis achegadas á costa, pasar pola de Caneliñas e a punta Cepelo para entrarmos en Portonovo, onde é visita obrigada o porto pesqueiro, a vila e a praia de Baltar. Camiño de Sanxenxo facemos outra parada para achegarnos ao miradoiro da punta Bicaño e logo, no centro da vila, para ver a praia de Silgar, o porto e as praias dos Barcos, da Panadeira, Lavapanos e Carabuxeira. Continuando pola estrada a Pontevedra, paramos no miradoiro de Palacios e na praia de Areas, desde onde podemos achegarnos ao illote do Laño e á Punta de Festiñanzo, onde hai outro miradoiro. De novo na estrada, quédanos facer un desvío á praia e punta de Pampaído, e volver para chegar ao miradoiro da Granxa, última parada, no linde con Raxó (Poio). Para baixar á praia da Granxa en coche é mellor facelo desde Raxó.