O litoral de Sada que non sae nas postais

As principais actividades do concello son os servizos (especialmente o turismo relacionado coas praias), a pesca e a industria. Acolle importantes mostras de patrimonio histórico e artístico: castros, igrexas, pazos, edificios modernistas... Paraxe: As Mariñas / Concello: Sada / Percorrido: 11 quilómetros (lineal) / Dificultade: Media Propoñemos un roteiro para descubrir a parte menos amábel da Costa Doce, o litoral do concello de Sada no que as rochas son o elemento dominante e forman unha parede continua, de cantís que nalgúns puntos superan os 50 metros de altura, con incontábeis entrantes e saíntes e case ningún punto de acceso doado ao mar. Un tramo de costa no que para acceder ás praias, das que as máis quedan mergulladas coa marea alta, hai que baixar escaleiras de máis de 70 chanzos. Mais tamén é un litoral que conserva a imaxe do natural, no que, aínda que a parte utilizábel do terreo está ocupada por piñeiros e eucaliptos, a vertical, inaccesíbel, está cuberta de loureiros e rebolos que medran e resisten, apegándose ás pedras e adaptando a súa forma á do cantil, no ambiente extremo que lles crea a exposición ao sol e a falta de auga. Comezamos a camiñada na praia do Cirro e desde ela imos á praia de San Pedro; no remate hai un carreiro que sobe ao cantil e desde alí seguimos á esquerda por outro carreiro, ben visíbel porque é transitado con frecuencia, que se interna no bosque para ir seguindo case sempre, con innumerábeis subidas e baixadas, o máis preto posíbel a liña da costa. Por el ímonos achegando ás puntas Gaivoteira, Pereirós e de San Mamede e o seu miradoiro; logo temos que subir polo camiño até chegar a unha curva á esquerda na que hai un poste indicador da dirección e da distancia ao castro da punta de San Mamede e uns metros despois atopamos á esquerda do camiño outro carreiro polo que seguimos para achegarnos, sempre polos desvíos da esquerda, á praia e á enseada de Lourido, á punta e á praia de Armenteiro, á praia de Lobos, á praia e á punta da Arnela, á Pedra da Herba e á estrada, en Fontán. Seguindo as indicacións de castelo de Fontán baixamos á punta de Fontán para ver a construción, a praia de Morazón e o porto. Baixamos a este e completamos o roteiro polo paseo do litoral até percorrer a praia de Sada e chegar ao pé da punta Corveiroa. Podemos completar a camiñada visitando a vila ou achegándonos ás brañas de Sada, unha zona húmida catalogada no Inventario de Zonas Húmidas da Galiza. O percorrido é máis longo do que aparenta porque os entrantes e saíntes da liña de costa aumentan a distancia e as continuas subidas e baixadas fan que tardemos máis do que nun comezo agardabamos.