O litoral de Muxía I

Muxía é unha localidade abondo coñecida pola sona do seu santuario da Barca e por ser a "Zona Cero" da chegada do chapapote do Prestige. Asentada á beira do mar da Costa da Morte, é o núcleo principal dun concello que acolle un importante patrimonio natural protexido nos LIC/ZEC e ZEPA "Costa da Morte", histórico-artístico e etnográfico, e un longo litoral, que se estende desde o interior da ría de Camariñas até a ría de Lires, que reflicte as características propias da contorna –recortado, con abruptos cantís, máis elevados na costa exterior, espazos recollidos, ocupados por coídos, e zonas abrigadas con areais–. Coñecelo, dada a súa ampla extensión, non é cousa de facer dunha soa vez. Pódese percorrer a pé combinando tramos do Camiño dos Faros con outros desvíos, mais tamén podemos achegarnos aos puntos de máis interese nun percorrido en coche que completaremos con camiñadas. Nunha primeira parte, en coche, visitamos o interior da ría. Facemos o percorrido saíndo de Muxía pola estrada que vai a Vimianzo até Os Muíños, onde nos desviamos pola que vai a Merexo e Leis, para facer unha viaxe de ida e volta con desvíos que, á volta, son sempre á dereita. Comezamos en Leis baixando á Area Grande, que coa marea baixa descobre un amplo banco marisqueiro. Á dereita da praia, no punto no que a canle fluvial se abre para transformarse en ría, desemboca, nun pequeno esteiro, o rego de Vilariño. Subimos a Leis e, na saída cara a Lago, temos un desvío para achegarnos á praia de Leis ou da Barreira. Volvemos á estrada para irmos un pouco máis adiante á punta do Lago, na que se atopa o faro, en realidade unha torre de enfiada que forma con outra que está, detrás, no monte, un aliñamento para entrar e saír da ría evitando uns baixos. De volta na estrada, ao pouco, chegamos a Lago, onde podemos parar para ver a praia –unha frecha de area que dificulta a saída ao mar do rego de Lago formando unha barreira que mantén asolagado o esteiro no que forma unha lagoa– ou seguir, pasar a ponte, e, xa na primeira curva, temos unha fermosa panorámica da praia e da contorna. Pouco despois chegamos a Merexo, onde podemos desviarnos ao portiño ou seguir até Os Muíños onde, á saída da localidade, temos indicados os desvíos ás praias de Muíños e de Borreiros, onde remata a estrada. Desde alí hai que volver á estrada principal e coller á dereita até a Baiuca onde temos o desvío, tamén indicado, á praia de Espiñeiredo e seguir até preto da praia de Fornelos. Hai que volver á estrada principal e, á dereita, xa estamos en Muxía, onde podemos facer un percorrido perimetral pola vila. Completamos entre a ida e a volta uns 30 km.