Litoral de Marín

O litoral de Marín conta con varias áreas de interese natural, aínda que está intensamente poboada (cidade de Marín e varias vilas) e explotada, cunha importante ocupación do litoral. Acolle importantes mostras de interese arqueolóxico (petróglifos) e etnográfico (salgas, portos e embarcacións tradicionais...) e conta con varias áreas para o paseo e o lecer. Paraxe: Ria de Pontevedra / Concello: Marín / Percorrido: 12 km (lineal) / Dificultade: Baixa Comezamos na alameda de Marín e temos por diante uns 800 metros de percorrido urbano, rodeando o valado da Escola Naval, para entrar nunha estradiña con beirarrúa acondicionada que transita moi próxima á liña da costa. Por ela baixamos á punta de Debaixo dos Pinos para chegar á praia de Portocelo; pasamos a punta de Rabuñagatos para acadar a praia de Mogor, onde ademais do areal podemos ver os coñecidos petróglifos. Aquí podemos seguir pola estrada, un pouco ao interior para subir e rodear a punta da Moa -na que hai un miradoiro sobre a ría- ou cruzar pola area até o remate da praia onde temos unha subida até a estrada. Camiñamos cara á praia de Aguete e, cando a estrada chega ao pé da praia, temos á dereita un camiño polo que podemos baixar á praia de San Brais e desde ela, pasando polo con de San Brais, entramos na praia de Aguete e, camiñando pola area, chegamos ao porto. Desde o porto de Aguete saímos pola estrada principal, pola que temos que camiñar uns 500 metros, para atopar un desvío á dereita que nos permite ir a Loira e baixar á praia para vela de perto e percorrer a súa acumulación de area, darlle a volta á frecha, seguir o camiño até a punta de Loira e coller por detrás da salgadura para rodear a praia e ir gañando altura até máis de 50 metros sobre o nivel do mar, con varios puntos panorámicos e so algúns carreiros por entre toxos da altura dunha persoa polos que baixan ás rochas os pescadores, no monte Sobareiro. Pasamos logo ao monte da Cova onde aínda subimos un pouco máis para baixar logo a Teoira, onde hai un camiño con piso de cemento que vai dar a outro de terra e que percorre a parte alta da praia, que ten por diante o illote Pinela. O camiño desemboca nunha rúa que nos leva á praia do Santo do Mar e desde ela, se a marea está baixa, podemos pasar á praia da Coviña e á de Lapamán onde remata o termo municipal de Marín. Con marea baixa hai un carreiro que permite subir case no remate da praia do Santo e logo, por entre unhas casas, outro polo que se pode baixar á praia da Coviña. Desde a praia da Coviña hai que volver á estrada e pasar por ela a punta de Lapamán para poder baixar á praia, xa en Bueu. Para facer este percorrido no coche temos que seguir as estradas máis próximas ao mar e os indicadores, aínda que nalgúns sitios a estrada faise moi estreita.