Litoral de Ares

O concello de Ares está situado na península que separa as rías de Ferrol e Betanzos-Ares. Ao longo do seu litoral, en parte protexido no LIC “Costa Ártabra”, hai numerosos puntos de interese e, para un primeiro achegamento, propoñemos unha viaxe en coche completada con varias camiñadas. Paraxe: Ría de Ares-Betanzos / Concello: Ares / Percorrido: 40 km (circular en coche + camiñadas) / Dificultade: Baixa Saíndo de Ares pola estrada que vai a Cervás e Chanteiro podemos ir logo, por pista de terra, á punta Segaño onde comezamos o percorrido, ou podemos ir desde Cervás ao miradoiro da Bailadora, desde onde temos amplas e fermosas vistas do litoral de Ares e da ría de Ferrol; desde alí podemos baixar pola estrada que vai a Mugardos, para percorrer logo, por pista de terra, o litoral do interior da ría e ir á punta Segaño. De punta Segaño vimos á capela de Chanteiro desde onde podemos achegarnos á praia, abrigada no fondo do seo, entre as puntas Segaño e Coitelada -para ir á punta Coitelada en coche temos que ir cara a Ares e a uns 600 metros, na Fonte do Cal, coller un desvío á dereita. De volta de visitar a punta temos un desvío á dereita, de terra, para ir á punta Avarenta, onde está a EDAR, a onde tamén podemos achegarnos desde Chanteiro por unha estrada. De volta en Cervás deixamos a estrada principal para ir á dereita por outra que vai máis preto da costa desde a que hai desvíos, á dereita, non aptos para coche, polos que podemos achegarnos á beira nunha zona de altos cantís e curiosas formas nas rochas -Punta Insuela, o castro de Santa Mariña e Cova dos Mouros (a cova atópase á esquerda do castro, na beira do cantil, é un furado do que sae unha pequena regueira que cae facendo unha fervenciña)- e máis adiante á punta do Boi e ao miradoiro de Augamexa. Dous quilómetros e medio máis adiante do cruce, a estrada achégase ao mar preto da punta das Mirandas e, ao pé da primeira casa que temos á dereita da estrada, hai un camiño que dá acceso ás escaleiras que permiten salvar os trinta metros de desnivel que hai para baixar á praia da Barrosa. Unha camiñada de 2 quilómetros permítenos ver de preto as outras praias da contorna (Colado, Estacas e Centeás) todas elas na parte baixa de cantís de máis de 20 metros de altura con escaleiras de acceso. Volvendo á estrada en quilómetro e medio atopámonos por enriba do porto de Ares, desde onde hai unha fermosa panorámica do seo e da vila. Uns 500 metros despois entramos na vila e imos ao porto. Seguimos logo por rúas interiores até A Ciscada, un bo sitio para parar e dar unha volta polo parque e pola area... Da rotonda da Ciscada temos 1,3 quilómetros até a baixada á praia de Seselle, e 600 metros máis adiante a baixada á praia do Raso. A seguinte parada é en Redes onde temos que camiñar para ver o porto, percorrer a localidade e achegarnos ao castelo e á praia de Area Morta.