Litoral da Capelada-Ortegal

Esta área fai parte dunha comarca de características únicas, con aspectos físicos particulares, na que podemos gozar de, a maiores dun fito xeográfico -un cabo bravío, un punto onde o litoral cambia de dirección, unha área con panorámicas excepcionais nas que se inclúen as duns dos cantís máis elevados de Europa (na Vixía Herbeira superan os 600 m de altura)-, dun lugar de interese etnográfico, espiritual e lendario recoñecido en todo o país, o Santo André de Teixido, no que ademais de saber dos poderes da herba de namorar, o valor terapéutico da auga da súa fonte, e os efectos protectores dos "santiños", podemos gozar dunha fermosa viaxe e aforrarlle á ánima o ter que facela no futuro, porque como reza o dito "Ao santo André de Teixido, vai de morto o que non vai de vivo". Percorrer un punto de interese xeolóxico internacional, recoñecido como Xeoparque, recentemente incluído na Rede Mundial de Xeoparques da Unesco, no que están presentes rochas cunhas características que non cadran coas que estamos afeitos a ver, rochas escuras e densas -as máis antigas da península Ibérica, con máis de 1.100 millóns de anos- dun elevado interese científico (orixinadas no fondo do océano e que foron desprazadas polos movementos da codia terrestre, na coñecida como Oroxénese Hercínica, á súa situación actual nos cumes do norte da serra da Capelada). Un espazo no que a transformación deses materiais deu lugar a solos nos que se desenvolven especies únicas, o que unido á súa situación nun lugar de características moi particulares e ao seu relevo con fortes desniveis e exposto ao vento, permite que se conserven especies xa desaparecidas na contorna próxima e que sobrevivan especies que desapareceron en zonas máis concorridas, características e valores polos que tamén está incluído no espazo protexido como LIC, ZEC e ZEPA 'Costa Ártabra'. Un lugar no que atoparemos espazo e motivos para numerosas andainas e variados percorridos: algúns indicados e outros que irán xurdindo, porque é posible, buscando a información precisa, e indo equipado de maneira conveniente e tomando as precaucións necesarias, ou participando en calquera das numerosas XeoRutas -percorridos e visitas guiadas para achegarse aos puntos de máis interese xeolóxico-, moverse por camiños, e atopar carreiros (nas zonas despexadas nas que hai gando solto) para achegarse a cantís, baixar a algunhas praias, visitar fervenzas e gozar das amplas panorámicas que se abranguen desde os miradoiros. Tamén podemos ter un punto de vista diferente da contorna e ver de perto algúns dos impresionantes cantís achegándonos á zona polo mar en viaxes organizadas.