Laza e a pista do marroquí

O concello de Laza forma parte da comarca de Verín e o seu territorio esténdese polo Macizo Central, o val do Támega e outras pequenas elevacións ao sur. As principais actividades son os servizos, a agrogandaría e o sector forestal, e conserva un importante patrimonio natural, histórico-artístico e etnográfico. Destaca a celebración do Entroido, un dos máis soados do país, coa presenza dos 'Peliqueiros'. Laza conta con áreas protexidas nos LICs Macizo Central e Río Támega. Na historia de Laza marcou un fito importante a construción das vías do tren que comunica Galiza coa meseta, pola dificultade do trazado, polas obras de enxeñaría realizadas (túneles, viadutos) e polas historias humanas que rodearon todo o proceso. A obra pasou por moitos imprevistos: os cambios de Goberno, a guerra, a morte do enxeñeiro xefe... Ao comezo da guerra quedaron 12.000 obreiros sen traballo o que deu lugar a numerosas revoltas e un consello de guerra xulga oito carriláns (un foi condenado a morte e oito a cadea perpetua). Despois da guerra estabelécense dous destacamentos penais e os presos políticos son obrigados a traballar nas obras. Dos 150 km, o 40% son túneles; 80 escavados a pico e pá, algúns de máis de 6 km de lonxitude. Para transportar o entullo, os víveres e os feridos tiñan un cable desde a vía a Correchouso e máis tarde construíuse unha pista de terra paralela á vía e comunicada con ela mediante túneles laterais, a Pista do Marroquí, deseñada polo enxeñeiro Augusto Marroquí que mide 24 km entre as estacións de Alberguería e Cerdedelo. A obra de ferrocarril máis cara do Estado español rematou en 1957. Levou por diante a vida de 12.000 persoas entre derrubes, feridas e o coñecido como 'mal da vía' (silicose). Nesta ocasión facemos un achegamento a Laza para coñecer algúns dos puntos de interese: igrexas, cruceiros, fervenzas... e facer un percorrido pola Pista do Marroquí. Partimos da vila de Laza, capital do concello, onde podemos ver algunhas casas tradicionais, un cruceiro curioso –construído enriba dun pozo– e a igrexa. E desde ela facemos un achegamento aos lugares de máis interese: á aldea tradicional de Vilameá, a Correchouso, a Cerdedelo... Pola estrada de Cerdedelo temos o acceso á Pista do Marroquí, a Toro e a varias fervenzas. Para facer unha camiñada propoñemos a Pista do Marroquí, que se pode facer desde Correchouso ou desde Toro. Unha ruta con amplas panorámicas sobre o barranco de Armada ao longo do curso do río das Cabras ou de Correchouso, que segue unha pista, en parte asfaltada e en parte derrubada, case a nivel pola que podemos camiñar unhas horas gozando da paisaxe e da flora da contorna.