Fraga de Catasós

É tempo dos bidueirais, das beiras dos ríos, dos soutos e das carballeiras, e por este orde; é tempo para as sorpresas porque en calquera recanto nos pode impresionar a pegada de cor dunha árbore solitaria, un anaco de mato ou un cultivo. Paraxe: Deza / Concello: Lalín / Percorrido: 6 quilómetros / Dificultade: Baixa Estes días achegámonos as fragas de Catasós, na contorna de Lalín, a uns 3,5 quilómetros do centro da localidade, de doado acceso, ao pé da estrada de Lalín a Ourense, aínda que sen sitio para deixar o coche polo que, se vimos de Lalín, temos que seguir un pouco arriba, uns 200 metros, pola estrada para deixalo no espazo que hai diante dun bar, e se vimos da dirección de Ourense, temos que estacionar tamén nun alargo que hai diante do mesmo bar, pero á dereita da estrada. A fraga de Quintela de Catasós, chamada tamén Carballeira ou Souto de Quiroga ou de Quintela, é unha pequena superficie de bosque autóctono asentado na aba arborada do val do rego de Quintela a unha altitude duns 550 metros sobre o nivel do mar. O seu maior interese reside no gran valor biolóxico dos castiñeiros que teñen o fuste máis alto de Europa (pasan dos 30 metros de altura, con case 5 metros de perímetro na base e uns 300 anos de idade). Na década de 1970 foron considerados pola FAO [Food and Agriculture Organization] como os de mellor porte forestal de Europa polo que a zona está protexida como Monumento Natural, desde o ano 2000, e ten marcados itinerarios para facer un percorrido que se achega aos puntos de máis interese. Na actualidade só se conserva un castiñeiro en bo estado (os outros exemplares están danados e algún caído) e varios carballos interesantes, polo que segue a ser un bo lugar para unha visita puntual, para un curto percorrido, sen ir máis alá dos límites da parcela; para deixarse levar polos camiños entre os arboredos dos arredores, ou para facer un roteiro seguindo a sinalización de Fragas de Catasós (indicado cunha folla de carballo de cor verde cunha frecha inserida para sinalar a dirección da marcha), que nos leva polas masas de bosque e polos lugares da contorna até completar un percorrido de 6 a 7 quilómetros. No traxecto imos atopar ademais algúns bos exemplares de sobreira, que conservan as pegadas de vellos aproveitamentos da cortiza, e ao saír do bosque as paisaxes da contorna, pradarías rodeadas de sebes nas que sobresaen os toros brancos dos bidueiros, entre o gris dos ameneiros e os carballos que durante o verán dan