Fraga da Cabana Vella (Os Ancares)

Un lugar atractivo para unha longa camiñada que se pode facer en calquera época do ano, aínda que para localizar e apreciar as estruturas das grandes árbores é mellor facela cando están sen follas. Unha camiñada ao longo da que podemos gozar, durante o achegamento, de amplas panorámicas que abranguen a magnitude do bosque enmarcado entre os dous cumes sobresaíntes da contorna, o pico de Tres Bispos e a Pena Rubia e, ao entrar nela, da magnitude das árbores que iremos descubrindo e recoñecendo a medida que camiñamos: as abeleiras, bidueiros e salgueiros nas zonas húmidas, os acivros nas sombrizas cos teixos nas partes máis altas, e os carballos entre os que, aquí e acolá, se ergue un toro, ou destaca unha copa, que delata a presenza dun exemplar que merece unha visita particular -dous dos carballos están incluídos no Catálogo de Árbores Senlleiras da Galiza- ao tempo que imos ollando outras especies do sotobosque: unhas estacionais, que son diferentes en cada época pero máis abundantes e variadas na primavera (narcisos, anemones, cáncaros, dentes de can, fentos…) e permanentes (trobisco macho, baladre, framboeseiro…) que complementan, diversifican e enriquecen a experiencia e o percorrido. Comezamos a andaina no Albergue dos Ancares -a onde chegamos indo de Cervantes á Degrada- que é onde temos que deixar o vehículo, seguindo a pista que vai cara a Tres Bispos até chegarmos, 1 km adiante, á fonte da Valiña, onde atopamos o desvío á dereita que baixa á Cabana Vella. Neste lugar, podemos decidir se facer unha camiñada de ida e volta, pasando dúas veces polos mesmos sitios, vendo as mesmas cousas desde diferentes puntos, descubrir detalles que nos pasaron desapercibidos no primeiro paso, e apreciar os cambios que produce no bosque a diferente posición do sol e o efecto das luces e as sombras; ou facer unha ruta circular, para a que tamén temos dúas opcións: ir á dereita baixar á Cabana Vella, percorrela, subir logo á Golada da Vara, coller á esquerda o carreiro que sobe, primeiro encosto e logo bastante tendido, ata a campa de Tres Bispos para baixar logo pola pista ata o punto de partida, ou seguir primeiro ata a campa de tres Bispos, alí coller o carreiro que sae á dereita, pola linde entre a carballeira e o mato de uces, que logo segue entre as árbores e leva ata a Golada da Vara, onde comezamos o camiño de volta e o percorrido polo interior da fraga para rematar coa subida desde o rego da Vara á fonte da Valiña.