Fervenzas de Mazaricos (II)

Neste percorrido con tres puntos de interese temos dous traxectos curtos e sinxelos e outro máis longo. Para comezar, imos de Pino de Val a Chacín e na estrada, a 1,5 km, temos un desvío á dereita para ir ao lugar de Gosolfre, onde uns 300 m máis adiante atopamos á esquerda un cartel da ruta e, seguindo as súas indicacións, imos dar a unha pista de terra que se bota monte abaixo, con bastante desnivel, ao longo de 1,5 km, para chegar ao río. Paraxe: Xallas / Concello: Mazaricos / Percorrido: 15 km en coche e uns 5 km a pé / Dificultade: Media Cruzamos o río pola pontella e remontámolo pola outra beira uns 200 m para acadar as fervenzas. A primeira que vemos está á nosa dereita e cae máis de 50 m en varios saltos, os de arriba só visíbeis agora, cando as árbores están sen follas, a que forma o rego de Gosolfre para caer ao rego principal. Case enfronte deste cae outro rego, o río do Couto, que se o remontamos un pouco nos descobre o último dos seus saltos. Seguindo adiante, ao cruzarmos a saída do rego do Couto polas pontellas de madeira, imos dar á fervenza do rego da Casa, outra sucesión de saltos que rematan nun de máis altura. Mais hai outro camiño máis doado para chegar a estas fervenzas que é desde a capela de San Paio, en Outes (o río é linde entre os dous concellos), a onde se chega percorrendo uns quilómetros máis no coche pola retorcida estrada de Chacín a Outes, por San Lourenzo, por onde mudamos a longa baixada por unha camiñada máis curta e moito máis a nivel, ben sinalizada, e polo interior dunha carballeira na que os brións e os fentos gabean polos toros das vellas árbores. Desde aquí, ademais, antes de chegar as fervenzas de Gosolfre, teremos a ocasión de achegarnos á fervenza de San Paio. De volta en Chacín imos á dereita pola estrada de Pino do Val á Serra de Outes, por santo Ourente, e a 3,5 km atopamos, á esquerda da estrada, a capela de santa Locaia do Burato, onde paramos. Detrás da capela atópase o río e uns metros augas arriba, a fervenza pola que cae uns 6 m o rego do Vao de Denociña. Cruzando o río e seguindo augas arriba atópanse varios saltos máis pequenos dentro dun frondoso bosque. Volvemos outra volta a Chacín para coller por detrás do lugar a estrada que vai a Vioxo e, a 1,5 km, no remate dunha recta e antes de cruzar o rego do Casteliño, atópase o punto de acceso á fervenza de Vioxo, da que nos separan menos de 300 m que percorreremos por un camiño entre piñeiros antes de baixar por un carreiro acondicionado con pasos e pasamáns. De Vioxo volvemos a Pino do Val e rematamos.