A fervenza do Marraxón mais o río Belelle

Aproveitando que o tempo mellora, medran os días e os ríos andan en augas altas, podemos aproveitar para ver o espertar da natureza, sempre madrugadora nas beiras da auga, e/ou facer unha visita a calquera das fermosas fervenzas que temos por todo o país. Nesta ocasión imos realizar unha dobre proposta: achegarnos ao río Belelle, un río non moi cumprido de extensión, mais cunha longa historia de aproveitamentos e fermosos tramos de natureza na súa contorna, e visitar nel o salto do Marraxón, no linde entre as parroquias de Viladonelle (Neda) e Sillobre (Fene), onde cae por un desnivel duns 45 metros de altura, nun espazo cunha interesante fraga con especies de ribeira e érbedos, carballos, loureiros, pereiras bravas… Paraxe: Ría de Ferrol / Concello: Neda e Fene / Percorrido: Desde Neda: 4,5 km en coche + 1,6 km a pé | Desde Fene: 5 km en coche + 700 m a pé / Dificultade: Media O río Belelle nace aos pés do Fontardión, en Goente (As Pontes) e desemboca en Neda, na Ría de Ferrol. No seu percorrido por unha área de rochas diversas alterna vales encaixados, con grandes desniveis e zonas de discorrer maino. Ao longo do seu curso conserva un importante patrimonio etnográfico, xa que foi obxecto dun intenso aproveitamento como forza motriz dos mecanismos de muíños, fábricas de papel e téxtiles, e nel instalouse unha das primeiras centrais hidroeléctricas. Este aproveitamento foi o impulsor do desenvolvemento da área de Neda onde, coincidindo coa existencia dos muíños, se instalaron as Reais fábricas de biscoito, que chegaban a producir cinco mil quintais de pan ao mes para abastecer a armada. Ao longo do río Belelle hai moitos puntos de interese aos que nos podemos achegar: a desembocadura na Ría de Ferrol, onde ten un pequeno esteiro; os muíños do Carrizo, ou a fábrica de papel da Mourela e do Cubo, edificios de boas dimensións que dan idea da súa importancia; a área de lecer de Maciñeira; o Pazo de Isabel II, que foi unha fábrica téxtil; as contornas das pontes de Sillobre e Formariz; o espazo de Riocuberto, onde un desprendemento de rochas oculta o río; Cabalar, onde se conservan os restos dun "machuco"... mais o interese principal atópase no salto do Marraxón. Podemos chegar á fervenza por dous camiños. Desde Neda, na estrada de Ferrol ás Pontes, collemos, na Mourela, un cruce á dereita que vai ao Roxal na parroquia de Anca (Neda), e no Roxal un desvío, tamén á dereita, até o pazo de Isabel II. Desde o pazo séguese o camiño que remonta o río até a central hidroeléctrica e desde ela por un carreiro chegamos á fervenza. Partindo de Fene e subindo por Sillobre ao Marraxón, desde onde podemos gozar de vistas da fervenza no miradoiro, para baixar logo polo espazo acondicionado, que salva, con escaleiras e un carreiro, os 150 metros de desnivel que nos separan da base da fervenza.