Do encoro de Pontillón de Castro ao Acibal

Unha camiñada con dous puntos de interese: o encoro e o cume, que tamén poden ser dúas visitas puntuais, porque o espazo entre un e o outro discorre por pistas forestais, entre eucaliptos, nas que non hai nada de interese, a non ser algunha pereira brava, que resiste, e algúns carballos novos, que conseguen saír adiante apurando as escasas opcións que se lle presentan de aproveitar a luz e o terreo nas beiras dun espazo inzado de competidores que os abafan, e algunhas plantas menores que agora amosan as súas flores. Paraxe; Monte Acibal / Concello: Pontevedra, Moraña, Barro / Percorrido: 12 km (ida e volta) / Dificultade: Media O encoro non é importante polo seu tamaño pero si pola súa utilidade: foi construído a mediados do século XX como unha das fontes de abasto de auga para a cidade de Pontevedra e desde comezos do século XXI tamén está acondicionado como espazo para o desenvolvemento de probas deportivas. Ten un camiño que o rodea, de case 3,5 quilómetros, e unha área de lecer con miradoiro na súa contorna o que o converte nun lugar moi axeitado para unha visita ou un paseo. E o Acibal destaca polas panorámicas de 360º que se abranguen desde el: polo oeste, a costa, as illas Cíes, as rías de Pontevedra e da Arousa e as serras que as limitan; e o interior cos montes Xiabre, Xesteiras e os montes dos Cregos, ao norte; ao leste, os cumes da Dorsal Galega; ao sur, os montes da Castrelada, A Fracha, a serra do Galleiro... e no seu pé, as brañas das fontes do río Rons e o curro de Amil. Para achegarnos ao encoro podemos ir desde Pontevedra, por Lérez, a Verducido, uns 9,5 quilómetros, ou desde Barro, collendo en San Amaro unha estrada á esquerda, sinalada como Verducido, Xeve e Ourense, uns 3,3 quilómetros. Para achegarnos ao curro de Amil, punto de partida para subir ao Acibal, -até onde hai un tramo de pista de terra e unha última subida que só se pode facer a pé, de 3 a 4 quilómetros ida e volta- podemos facelo desde Moraña, pola estrada de Moraña a Pontevedra, uns 8 quilómetros; desde Pontevedra por Xeve, uns 15 quilómetros; e desde Barro, Santo Antoniño, pola estrada que pasa polo campo de fútbol, 3,5 quilómetros. Para facer a ruta completa o máis acaído podería ser facer primeiro a subida, de case 400 m de desnivel, e baixar logo, para iso temos que comezala no encoro, mais como cada quen ten os seus gustos, pódese comezar ou rematar onde mellor pareza. A camiñada de ida e volta son de 10 a 12 quilómetros e 3,5 quilómetros máis coa volta ao encoro. Compre preparar un itinerario porque non hai ningún sinalado, a non ser a Senda do Loural, pero sen indicadores suficientes como para poder seguila, o que é unha pena porque un tramo transita, fóra das pistas, por un camiño vello, con partes empedradas e fondas rodeiras, que pasa ao pé dunha pequena mancha de carballos de bo porte, asentada no fondo do val do rego das Cortes.