Do Cabo Vilán a Santa Mariña

Facendo esta camiñada coñeceremos un dos puntos máis emblemáticos da Costa da Morte, percorreremos un dos itinerarios máis coñecidos desta contorna (o tramo entre Vilán e o cabo Tosto) e iremos un pouco máis alá. Un traxecto duns 15 quilómetros, incluídos os desvíos, por un trazado cómodo, a non ser nalgúns tramos fóra da pista. Paraxe: Costa da Morte / Concello: Camariñas / Percorrido: 15 quilómetros (lineal) / Dificultade: Media Comezamos no faro de Cabo Vilán desandando o camiño que fixemos para achegarnos a el e, ao chegar ao sitio onde se deixan os coches, coller un carreiro que se achega ao coído da Arnela e sobe á pista, con berma acondicionada para peóns, que vai ser a base de parte do noso itinerario, e desde ela imos vendo a enseada da Arneliña e como mudan as formas do cabo Vilán. Chegando á Pedrosa hai un espazo de aparcadoiro e un carreiro que permite achegarse aos cantís da punta, e un pouco máis adiante un desvío á esquerda polo que podemos baixar á praia, a onde tamén se chega seguindo polo camiño principal. Desde a praia temos carreiros para pasar polas puntas e os areais (á altura da praia de Area Longa temos por enriba da pista o foxo do lobo). Pasado este areal, chegamos á punta dos Forcados, onde se atopan as coñecidas rochas con nome propio (O Oso, Os Amantes...), e despois a praia de Reira, a última deste tramo. A partir de aquí seguimos pola pista, o litoral é unha liña case recta de rochedo erosionado que só se altera ao pé da Laxe de Reira, onde forma un pequeno abrigo e vemos mar a dentro as Baleas do Tosto, e un pouco máis adiante na Laxe dos Difuntos onde se forma o seo de Lucín. Ao pasar o seo de Lucín deixamos a pista, collemos un desvío á esquerda para achegarnos á punta do Boi e o seu coído, que son a parte máis saínte do Cabo Tosto, e onde a costa cambia de dirección para entrar na enseada do Trece onde o primeiro elemento de destaque é o Cemiterio dos Ingleses, que acolle os restos dos náufragos do buque escola Serpent afundido nesta costa. Seguimos pola beira, sen volver xa á pista, para pasar pola enseada do Batel, a punta das Paredes e percorrer a praia do Trece que conserva un completo sistema de dunas que inclúe unha remontante, na que o vento leva a area até o cume do monte do Veo, e tamén acolle algunhas das últimas camariñas da costa de Galiza, e no remate da praia podemos, aproveitando o Camiño dos Faros, subir ao Penal do Veo e baixar ao porto de Santa Mariña ou seguir cara á punta e rodeándoa ir ao porto de Santa Mariña onde rematamos.