Días curtos e neve nos altos

Camiñamos irremediablemente cara ao inverno: días curtos, tempo cambiante, temperaturas baixas... Parece que todo se conxuga para metérmonos na casa e deixar o de andar e ver para ocasións máis doadas, pero por outra banda é a única época do ano na que podemos gozar dun espectáculo pouco común, e menos duradeiro, na meirande parte do noso territorio, no que a presenza do Atlántico, e as súas correntes mornas, teñen a capacidade de regular a temperatura e manter afastado do litoral, e de grande parte do país, o fenómeno co que mellor se identifica a estación na que entramos, a neve. Para poder gozar da neve temos que ir cara ás serras da Dorsal, ao Macizo Central e ás serras Orientais Para poder gozala temos que ir cara ao interior, ás serras da Dorsal (Faro, Suído,…) onde é un fenómeno ocasional e pasaxeiro, ou ao Macizo Central e ás serras Orientais, onde ten presenza habitual e unha duración máis prolongada. A cuberta branca, uniforme, muda por completo a paisaxe, transfórmaa, envolve as formas, elimínalle as durezas, as arestas, as cores, para convertelo todo nun mundo suave e mol que atrae e convida a entrar, pero tamén borra os camiños e fai difícil moverse por ela, polo que non debemos deixarnos enganar, a realidade segue estando debaixo, por iso tampouco debemos aventurarnos nos espazos nevados sen un bo coñecemento do terreo ou sen a compaña de persoas expertas porque, como diciamos na entrada, un cambio de tempo ou a falta de luz, pódennos poñer nun serio perigo. Pero non por iso imos deixar de achegarnos aos espazos nevados, podemos facelo sen problema tendo en conta unhas mínimas precaucións: levar materiais, roupa e calzado axeitado, non apartarse das estradas e os camiños, e irmos a lugares con boas vías de acceso ou a espazos acondicionados para o goce deste fenómeno e deste tempo, como poden ser as estacións de montaña e as localidades das proximidades das grandes alturas, onde sempre teremos información axeitada, directa e de proximidade e, en moitos casos, aloxamento,con reserva previa. Na Galiza só contamos coas instalacións dun espazo acondicionado para a práctica dos deportes de inverno, a Estación de Cabeza de Manzaneda, á que se achega moita xente, pero tamén podemos gozar da neve noutros lugares excepcionais como poden ser a maioría das localidades do Courel, O Cebreiro, en Pedrafita, entre os Ancares e O Courel (ao pé dunha estrada principal sempre aberta ao tráfico na que, en caso de necesidade, actúan inmediatamente os medios mecánicos para mantela despexada), e un algo máis lonxe Piornedo, nos Ancares, que nos ofrecen, a maiores de fermosas imaxes, unha completa visión das habilidades, da capacidade de adaptación e do bo saber e facer das persoas que nos precederon.