A Devesa do Cervo e o Montouto

Esta ruta combina o interese paisaxístico (vistas sobre o Courel e as serras dos Cabalos, de Cereixedo, O Cabreiro e A Lastra), xeolóxico (formacións rochosas, fervenzas...), natural (devesas, bosques de ribeira, soutos, matogueiras…) e etnográfico (mazos, pontes, poboacións tradicionais…). Paraxe: O Courel / Concello: Quiroga / Percorrido: 17 quilómetros (ida e volta) / Dificultade: Alta O Montouto, con 1.541 metros, é o cume máis alto da serra dos Cabalos e lugar de confluencia desta coas do Cereixedo e A Lastra, e de varios concellos: Quiroga, Vilamartín de Valdeorras e Oencia (León). O rego de Montouto recolle as augas da aba occidental do Montouto e lévaas, nun curto percorrido de gran desnivel, até o Soldón, tributario á súa vez do Sil. No seu curso atópase a devesa do Cervo, unha das interesantes fragas do Courel pola súa conservación, pola súa biodiversidade e por acoller algunhas árbores senlleiras. Desde Quiroga cóllese a estrada á Cruz de Outeiro e A Seara. Un pouco antes de chegar a Soldón atópase, á dereita da estrada, un indicador que sinala O Mazo. Baixamos pola pista de terra e deixamos o coche xunto ás casas do lugar. Para comezar a ruta cruzamos o río e seguimos cara á dereita, podemos baixar até a ferraría, cruzar o río e remontalo ou seguir o camiño polo souto do lugar. A ruta segue pola beira do rego de Montouto e atravesa as devesas de Montouto e Mazais. Pouco despois de comezar a seguir o río atopamos o rego de Rinán, un afluente no que hai unha pequena pincheira. Na devesa do cervo podemos ver varias árbores de bo porte (carballos, castiñeiros) e unha fervenza ou pincheira, como se chama no Courel. Seguimos subindo até os cumes e atopamos coa pista de terra que vén desde A Seara e vai até Arnado (León). A 700 metros podemos desviarnos por unha aresta pola que se sobe ao cume do Montouto, se seguimos un carreiro pouco visíbel e con tramos perigosos. Tamén podemos pasar por debaixo da canteira de lousa e remontar polo cortafogos. O camiño de volta facémolo polo mesmo percorrido, pero hai varias opcións máis: volver pola pista que vai á Seara; baixar do Montouto pola aresta contraria até atopar unha pista de terra que seguimos e, despois de atravesar un souto xa na parte baixa, até o río Soldón, onde coincidiremos en parte co sendeiro homologado PR-G 191 A Seara-Rugando, desde onde podemos seguir até a Cruz de Outeiro ou volver até a aldea do Mazo.