DesOrdes Creativas. Gozando da arte na rúa

Nos últimos tempos son moitas as vilas e cidades que están a loitar contra as medianeiras impersoais e os espazos inacabados, ou mal rematados, froito case todos eles dun desenvolvemento desordenado do urbanismo, coa inclusión de obras, maiormente pinturas murais de gran tamaño e, na maioría dos casos, dunha alta calidade artística. Paraxe: Vila de Ordes / Concello: Ordes / Percorrido: Uns 15 km en coche e de 5 a 7 km a pé / Dificultade: Baixa Pero Ordes foi a pioneira no impulso desta clase de traballos e a primeira en darlle unha continuidade. Ordes foi a primeira vila galega en acoller e promover o desenvolvemento da actividade creativa muralística. A primeira en crear un festival de arte mural "para transformar espazos en desuso ou abandonados en lugares de vida e cor para o goce colectivo que, a maiores de ser unha ferramenta de rexeneración urbana van convertendo a contorna nun grande museo a ceo aberto"; e desde o ano 2009 dálle continuidade á iniciativa traendo á vila, cada segunda semana do mes de agosto, unha selección de artistas de entre os mellores do panorama internacional. Xa van alá, fixéronse en 2021, catorce anos de DesOrdes Creativas. Naceron e medran coa mesma intención: como unha aposta pola calidade e a valoración do traballo dos pintores de murais e a finalidade de loitar contra a mala imaxe que ofrecen os paramentos dun desenvolvemento urbano pouco coherente e disperso, con obras artísticas de gran nivel e duración limitada. Por iso algunhas, das máis antigas, foron vencidas polo tempo e outras están a ser derrotadas pola exposición aos elementos, mais, con todo, a colección, á que, como resultado de cada nova edición do festival se engaden outras creacións cada ano, conta con extensión e calidade suficiente como para ter en conta a vila de Ordes como destino dunha viaxe de interese e atractivo abondo e achegarse a coñecer, visitar e gozar deste museo ao aire libre, aberto a todas horas, todos os días da semana e en todas as épocas do ano. Mais para poder aproveitar a visita con eficacia cómpre ir ben preparado: dispoñer dun bo mapa, no que ir marcando os lugares visitados, preparar itinerarios por zonas, para non facer longos desprazamentos sen proveito, e contar, se é posible, con axuda electrónica (GPS). Para completalo nun destes curtos días do outono fixemos un combinado en coche, ao longo da estrada A Coruña-Santiago, para irmos aos de máis lonxe e aos das aforas, e un duplo "bucle" a pé para ver os do centro e os das proximidades. Ao longo do traxecto ademais de ir descubrindo a cantidade, variedade e calidade das obras; imos vendo a evolución dos traballos desde o tamaño máis reducido e o estilo máis "grafiteiro" dos primeiros anos ás grandes dimensións e variedade de estilos dos actuais.