Da praia dos Riás á punta de Razo

Neste tramo do litoral é imposíbel facer un percorrido continuo polo abrupto do relevo, altos cantís separados por vales fondos e estreitos polos que escoan cara ao mar, en forma de minguados regueiros, as augas dos arredores; pero con numerosos e interesantes espazos puntuais aos que se pode acceder desde as localidades máis próximas, con curtas camiñadas de ida e volta e variado interese. Paraxe: Costa da Morte / Concello: Malpica e Carballo / Percorrido: 10 quilómetros (ida e volta) / Dificultade: Media Podemos comezar indo de Cambre á praia dos Riás ou desde Aviño á praia das Torradas, a única diferenza é o punto de partida, porque o percorrido a pé é de ida e volta. Se comezamos na dos Riás temos que ir un pouco atrás, uns 600 metros, para coller a pista de terra que a uns 200 metros ten un desvío á dereita para baixar á punta da Pedra Negra e o Cociñadoiro. Desde alí veremos unha panorámica da costa até as illas Sisargas e dos cantís dos Castelos. De volta na praia dos Riás, podemos pasar á das Torradas pola area, se a marea está baixa, ou remontar un pouco o rego dos Riás (que desemboca na praia) e cruzalo para subir á estrada que desde Aviño se achega á praia das Torradas. Desde esta, ao pé da escaleira de acceso, onde desemboca o rego do Piñeiro, sae un camiño-carreiro que fai parte do roteiro para bicicletas "Ruta dos Pinos do Mar", para achegarnos á praia da Pradeira e ao camiño que, despois de cruzar o rego que desauga na praia da Pradeira, sobe ao lugar de Santa Mariña, xa no concello de Carballo. Seguindo polo camiño, de fronte, a uns 100 metros, atopamos un desvío á esquerda, pouco transitado, e nel, a uns 200 metros, outro desvío á esquerda, un carreiro menos marcado aínda que, por entre as leiras abandonadas, os fentos e os toxos do cantil, nos permite chegar á Ferreira ou punta de Santa Mariña, límite entre os concellos de Malpica e Carballo, desde onde temos, cara a atrás, unha vista do tramo percorrido e, cara a adiante, o seo das Tullas, coa parte baixa do cantil escavada por numerosas furnas, e a punta de Razo e as illas Percebeiras. Para chegar á punta de Razo temos que volver ao camiño e seguir por el até a beira do cantil das Tullas, para seguir logo por un carreiro que sae ao camiño que baixa á punta de Razo. A volta facémola polo camiño da ida obviando os desvíos puntuais. Desde a praia dos Riás, ao regreso, podemos ir á praia de San Miro sen volver a Cambre. Collemos na subida o desvío á dereita polo que fomos ao Cociñadoiro e, nuns 2 quilómetros, saímos á estradiña que, cara á dereita, baixa a San Miro.