Costa de Galiza, concello a concello II

Pasamos por puntos senlleiros da xeografía Ibérica —o de máis ao Norte, a Estaca de Bares, e o máis occidental, o Cabo Touriñán—, e mundial, Fisterra; por Lugares de Interese Xeolóxico —A Capelada, Burela…—, por numerosos Espazos protexidos —Parque Nacional das Illas Atlánticas de Galiza, Parque natural de Corrubedo, e numerosos LIC/ZEC e ZEPAS—. Paraxe: Costa galega / Concello: Varios / Percorrido: 2.000 km / Dificultade Baixa E como nós somos moi dados ao natural, gozamos coa descuberta e a observación dos seres que medran neses medios de condicións extremas para o desenvolvemento da vida, uns hábitats que precisan de adaptacións específicas para resistir a forza do sol, a falta de auga, o bater do vento e das ondas, ou o exceso de sal…, e modifican as súas formas e os ciclos de vida e, como resposta, presentan particularidades que as fan únicas. Tamén camiñamos por lugares de interese histórico, artístico e patrimonial —asentamentos castrexos, algúns coñecidos (Fazouro, Baroña, Donón…) e outros, máis de 20, que conservan formas e estruturas pero permanecen ocultos baixo os entullos e a vexetación—; vimos máis dunha ducia de castelos; portos de todas as idades, desde os primeiros tempos históricos (Bares, A Covasa…) tradicionais e actuais, e gozamos coa presenza das embarcacións de formas e tamaños variados axeitadas ás condicións do medio no que van desenvolver o seu traballo; instalacións industriais —salgas, factorías baleeiras, estaleiros, saíñas, cetarias—; Faros, e outras construcións e enxeños non relacionados coa vida do mar pero que se instalaron na súa proximidade para aproveitar os recursos que se xeran ao seu carón como muíños (de mareas e de vento), ou que tiñan no mar un punto de expansión para a achega de materiais e a distribución de produtos (telleiras, serradoiros…). E tamén vimos e coñecemos as transformacións ás que foi sometido pola nosa man, nalgúns casos de forma abusiva e con pouco acerto, e a súa importancia actual porque a costa é a porta do mar, do que é inseparábel, e é, por tanto, unha importante fonte de recursos, e soubemos da relevancia que a costa e a proximidade do mar segue a ter na actualidade xa que, ademais de continuar a ser intensamente explotada, soporta a maior parte da poboación galega (70%) con todas as actividades e infraestruturas que iso implica: ocupación con recheos, vías de comunicación, vivendas e contaminantes. Para falar da nosa costa farían falla moitas páxinas, pero con esta achega só queremos chamar a atención sobre a infinidade de posibilidades que ofrece para gozar e a importancia de coñecela, valorala e preservala para o futuro..