Costa de Bueu

Ten unha importante fachada costeira ao norte, na ría de Pontevedra, e ao leste, na ría de Aldán, cunha costa moi recortada e diversa, con zonas abrigadas e expostas, areais, praias, rochedos e cantís. Acolle importantes valores naturais, asociados aos ecosistemas costeiros protexidos no “Parque Nacional das Illas Atlánticas (Arquipélago de Ons)” e nos LIC/ZEC “Cabo Udra” e “Ons-O Grove”; e culturais (peiraos e embarcacións tradicionais, salgas...) e serve de base para as principais actividades económicas (pesca, marisqueo, acuicultura, turismo...). Paraxe: Península do Morrazo | Concello: Bueu | Percorrido : 28 km en coche, máis camiñadas | Duración: Unha xornada Propoñemos unha viaxe na que combinando tramos en coche e camiñadas podemos facer un percorrido para coñecer os puntos máis interesantes e accesibles, ao longo dos que iremos descubrindo vivendas típicas, construcións portuarias, embarcacións de distintos tipos, antigas instalacións industriais e preindustriais, curiosas formacións rochosas e atractivas paisaxes. Non é doado facer un percorrido lineal porque hai tres sitios con estradas nas que se circula nun só sentido –o centro de Bueu, o percorrido polas praias de Agrelo e Portomaior e o acceso á Area de Bon– que, se non os temos en conta, pódennos facer dar máis dunha volta. Unha opción é comezar en Bueu, saíndo do centro da vila en dirección a Marín e Pontevedra, onde pronto atopamos o desvío ás praias de Agrelo e Portomaior, a estrada dun só sentido percórreas un tramo bastante longo, e no remate debemos seguir o desvío á esquerda sinalizado. Na estrada principal volvemos saír á esquerda ata chegar ao desvío á praia de Lapamán. De Lapamán volvemos a Bueu para coller o desvío, á dereita da estrada, que nos permite circular pola beira do mar, para ver as praias do centro da vila e o porto e saír no remate á estrada principal para desviarse logo á praia e ao porto de Beluso, e seguir a estrada cara á punta Trimiño, que logo vira para subir á localidade. No centro de Beluso temos os desvíos aos outros puntos de interese da costa: a Cabo Udra, praia do Ancoradoiro e praia da Mourisca, e á Area de Bon e praia de Lagos. Polo desvío a Cabo Udra chegamos ao aparcadoiro da entrada ao espazo natural (o percorrido por Cabo Udra ten que facerse a pé) e a praia de Ancoradoiro; e, pola estrada da dereita, á praia da Mourisca desde onde podemos acceder, a pé, cara á dereita, á praia e a punta de Cornide e a praia da Tulla; e, cara á esquerda, á salga, ás puntas Mourisca e do Cagadoiro e á praia do Pedrón. Polo desvío á Area de Bon temos que baixar, volver subir, e irmos logo á esquerda para baixar á praia de Lagos.