De Corme ao faro do Roncudo

Percorrer un camiño no que o reto non está en chegar senón en gozar do sitio e apreciar as miudezas é outra maneira de andar e ver e desta volta como o traxecto era curto e había tempo... Paraxe: Costa da Morte | Concello: Ponteceso | Dificultade: Media | Percorrido: 4 km (lineal) Saímos do porto de Corme pola beira da estrada e detrás da primeira curva, ao tempo que gañamos altura, xa temos a primeira mostra do que vai ser unha constante en todo o traxecto, unha sucesión de puntas, nas que o mar, aparentemente calmo, bate con forza, e seos nos que se amorea a escuma e onde se agochan pequenos areais e coídos; e atopamos o coído da Cetárea, un pequeno seo co seu coído, e unha vista do peirao que defende as embarcacións da forza do mar e do vento neste abrigo da Costa da Morte, e despois deste outro seo, o dos Coídos, e a punta da Granxa, e logo un novo seo -ao que podemos achegarnos deixando a beira da estrada- a area das Cunchas e a punta das Chans. Un pouco adiante, desde a punta do Aguillón, temos á vista un dobre seo, o da desembocadura do rego do Espiñeiral, que pechan unhas pedras baixas, detrás das que se forma unha fermosa e tranquila poza, e a punta das Gralleiras que protexe outro seo que acolle unha pequena praia, á que é posible achegarse por un carreiro que se atopa, pasada a curva, ao pé dun sinal da estrada. De volta na estrada seguimos uns 500 metros, ata chegarmos a un pequeno rego, antes de cruzalo hai un carreiro polo que se pode baixar a unha praia minúscula, que oculta o mar na chea, que se forma na desembocadura ao abrigo da Ínsua. Hai que volver á estrada, para deixala nada máis pasar o rego, e coller un carreiro á esquerda que fai parte do novo trazado do camiño dos faros, que antes seguía a estrada, para, con bo criterio, separalo da mesma, e que nos leva preto da beira dos cantís, pouco elevados, de rochas cen veces fendidas e cuarteadas, ao pé da punta dos Carreiros e do mar da Eiruga, co seu seo e a súa furna, antes de meterse nun novo seo que se forma na saída ao mar doutro pequeno rego, que se cruza por unha pontella de madeira, para achegarnos á punta Seixuda, por debaixo da área de lecer, e seguir por fóra da estrada pasando ao pé da punta das Cruces, antes de chegar a ela hai outra furna, e rematar ao pé do faro. A volta faise pola beira da estrada, sen desvíos, pero aproveitando os novos puntos de vista.