Camiñando polo litoral do Vicedo

O Vicedo ten unha costa dun enorme valor paisaxístico, xeolóxico e natural e, para coñecela mellor, imos tentar un percorrido a pé achegándonos aos puntos accesíbeis. Paraxe: A Mariña Occidental / Concello: O Vicedo / Percorrido: 22 km (lineal) / Dificultade: Media Comezamos na praia da Abrela, asentada no tramo final do rego de Escourido, e logo desviámonos ao Porto do Val, un pequeno seo, praia e porto, detrás de varios illotes. De volta á ruta principal, chegamos ao acceso ao Fuciño de Porco que, ademais do propio lugar, ten outros puntos de interese: o primeiro é a praia do Alecrín, un desvío á dereita polo que temos que camiñar uns 400 m, praia e coído aos que se accede coa axuda de cordas. De volta no camiño temos, máis adiante, outro desvío á dereita duns 750 m, para achegarnos aos restos da cetárea das Medas do Castro, aos pés dun cantil moi recortado que ten de fronte a illa Gaveira. Outra volta ao camiño e veremos, á esquerda, o seo e a praia da Pereira e as puntas e illotes que hai entre ela e a praia de Area Maior, e chegamos a un dos puntos de maior interese e máis visitado, a punta do Fuciño de Porco, na que podemos gozar de vistas espectaculares. Logo hai que volver á estrada principal para chegar ás praias de San Román e de Area Grande até Os Castelos e incorporarse ao camiño para ir á punta Merceira. Temos que volver á estrada para ir ao miradoiro de Moreiras; despois collemos o primeiro desvío asfaltado á dereita para ir até Vilasuso, desde onde, seguindo os Camiños Naturais, rodeamos o monte Vixía do Vicedo para achegarnos ao miradoiro das Laxes, a máis de 100 m de altura por enriba do mar, o punto desde o que temos máis preto a illa Coelleira. Pasamos punta Chileteira, un fermoso lugar con illote, agullas e arco, e chegamos á praia de Xilloi, na que desauga o rego da Veiga. Desde Xilloi temos por diante outro tramo de terreo elevado dominado polo monte da Atalaia que tamén rodeamos collendo un carreiro que arranca da praia e logo gaña altura para incorporarse a un camiño ancho, a uns 50 m por enriba do nivel do mar, desde onde, cando deixan os eucaliptos ou cando pasa achegado ao cantil, podemos ver os baixos do Peado e o seo e a punta do Campo Branco. Por este camiño, saímos ao lugar de O Curral e collendo á dereita, ao acceso á praia do Caolín. Desde ela, pola beira, imos á punta do Castro. De alí ao paseo que leva á praia de Vidreiro e ao porto do Vicedo. Continuando pola beira, pasamos pola praia do Vicedo, o paseo e a praia dos Castelos e chegamos á praia de Area Longa. Temos por diante un quilómetro ben cumprido até chegar á punta da Cova, onde hai unha fermosa furna, e a praia de Chamadoiro, que remata debaixo das pontes do Sor, onde nós tamén rematamos o percorrido.