Camiñando polo litoral de Baiona

Percorrelo é doado porque case ao longo de todo el atopamos espazos acondicionados para camiñar, de piso regular e sen grandes desniveis. Paraxe: Contorna da ría / Concello: Baiona / Dificultade: Baixa / Percorrido: 13 quilómetros Desde A Ramallosa un trazado entre a estrada e o esteiro, protexido xunto coa praia como LIC/ZEC A Ramallosa, lévanos ao pé da frecha da praia Ladeira. Aproveitamos para darlle unha volta: polo interior, por un carreiro á beira do feche do parque de campismo que a ocupa, até chegar á boca do río e volver pola parte de fóra, polo areal, para reincorporarnos ao paseo que continúa pola traseira das dunas ou seguir pola area até Santa Marta, onde ao pasarmos polo porto do Burgo subimos á capela para gozar da panorámica da enseada. Logo baixamos á praia, cruzamos o rego de Baíña e continuamos pola beira do porto até chegar á praia da Ribeira. Desde alí entramos no recinto de Monterreal para saír á praia Barbeira e percorrer o perímetro exterior das murallas pasando polas puntas do Cangrexo e de San Antonio, polo alto da praia da Figueira, dobrar a punta do Boi para descubrir a metade sur do litoral, a liña de rochas contra as que escachan as ondas. Completamos o percorrido arredor do monte pasando pola praia dos Frades e a punta do Gobernador e desembocamos na praia Cuncheira. Desde aí seguimos polo trazado delimitado para peóns e ciclistas, entre a estrada e o mar, desde onde gozamos das panorámicas nos distintos miradoiros, descubrimos pequenos abrigos como o de Area das Vacas, onde desemboca o rego das Tres Regueiras ou río das Fragas e podemos ver a rampla e o vello torno, xa en desuso, que servía para arrastrar fóra da auga as embarcacións e así protexelas dos temporais, e o seu grupo de construcións, moitas abandonadas e estragadas, nas que os mariñeiros gardan barcos e aparellos; e as pequenas enseadas da Bombardeira, do Tío Andrés, Fornos e As Voltas; e rochas curiosas pola súa estrutura ou o seu tamaño entre as que chama a atención O Bombardeiro, un con que fai honra ao seu nome cando as ondas estouran contra el impulsando a auga escumenta a grande altura, e o Cabo Silleiro, que se prolonga no mar polas illas Carral e Polbeiras e outros cons nos que descansan grupos de aves mariñas. Ao dobrar o cabo a costa segue a manter o seu aspecto rochoso e rexo até o límite do concello na punta das Negras. Á volta podemos completar a camiñada subindo ao miradoiro da Virxe da Rocha.