Cabo Ortegal

Cabo Ortegal, un punto emblemático da costa galega desde perspectivas diversas, ben merece unha viaxe para achegarse até alá e coñecelo. No xeográfico é o punto onde o Atlántico comeza a ser Cantábrico, ou onde o Cantábrico se funde co océano, e tamén é o punto onde a costa cambia de dirección de leste-oeste a norte-sur. Paraxe: Ortegal / Concello: Cariño / Percorrido: 10 km (a pé ou con vehículo) / Dificultade: Baixa No paisaxístico trátase dun lugar no que destacan os altos cantís que se prolongan polos Aguillóns, nos que o mar bate aínda nos días de calma, e onde a vista pode gozar de panorámicas até o infinito e incríbeis solpores. No xeolóxico é o sitio onde se atopan as rochas máis antigas da Península Ibérica que se desprazaron desde o fondo do océano até dar orixe aos cumes e aos cantís da Capelada, rochas con características pouco comúns, escuras e densas -anfibolitas, granulitas, peridotitas, ecloxitas (o maior afloramento do mundo), e serpentinitas-, que fan de Ortegal un Xeosite, lugar de interese xeolóxico, mundial, espazo proposto por diversas entidades e os concellos da zona para crear un Xeoparque. No ambiental conta con especies únicas porque as rochas ao descomporse crearon un terreo que favorece ou dificulta o desenvolvemento de diferentes especies vexetais, e isto sumado á exposición aos elementos obriga os seres vivos que se desenvolven nesa contorna a crearen modificacións estruturais e a adoptar mecanismos que lles permitan a supervivencia. A maiores, ao ser un punto exterior, é un lugar de paso obrigado para as aves migratorias tanto as que se desprazan preto da costa como as aves de augas abertas que fan o traxecto norte-sur ou sur-norte, dependendo da estación, para ir aos seus lugares de cría ou de alimentación e descanso. Por todo o anterior tamén se atopa protexido dentro do LIC/ZEC "Costa Ártabra" e na ZEPA "Espazo Mariño Candieira, Ría de Ortigueira e Estaca de Bares". Chegar a Ortegal non é difícil, mais é un deses sitios aos que hai que ir adrede. Podemos facelo como un complemento da visita ao Santo André de Teixido seguindo polo lombo da serra da Capelada até a Vixía Herbeira (miradoiro e cantís dos máis altos do continente) e seguir para coller o desvío, á esquerda, á Vacariza e, un pouco antes de chegar ao lugar, outro desvío á esquerda por unha pista que, polo monte Faroleiro, nos leva á estrada preto xa do faro; ou facelo polo camiño natural desde Cariño. Desde Cariño tamén se pode ir a pé combinando un percorrido urbano, tramos de estrada, o camiño -acondicionado- desde o miradoiro da punta Gabeira á ermida de San Xoán do Trebo, máis estrada -nun último tramo con beirarrúa-, até o faro, e volver; un traxecto que non chega aos 10 km.