Cabanas, do Eume ao rego do Castro

Unha camiñada duns 8 quilómetros permítenos percorrelo, e volver, nunhas tres horas. Paraxe: As Mariñas / Concello: Cabanas / Percorrido: 8 quilómetros / Dificultade: Baixa Accedemos á praia da Madalena pola entrada que hai ao pé da ponte do Eume para deixar o coche na ampla zona de aparcadoiros que está ao longo do parque, detrás do areal. Desde aquí pasamos por debaixo da vía do tren e seguimos até a estrada para irmos un pouco á esquerda e poder cruzala e, seguindo de fronte, pasar por debaixo da vía de acceso á autoestrada e saír ao pé dos pantaláns que forman o porto no esteiro. Agora, xa sempre pola beira, e por un espazo acondicionado, chegamos ao arranque da ponte, cruzamos a estrada e, polo paseo imos até o Estreito, a boca de saída ao mar do río Eume, para pasar por debaixo da ponte do tren e entrar na praia. Despois de percorrer o seu quilómetro de lonxitude atopamos, no remate, unha escaleira que nos permite subir ao alto do cantil por onde hai un carreiro que vai seguindo a liña da costa e desde o que imos entrevendo, polo medio dos loureiros e dos carballos que manteñen no seu lugar, a liña das cortadas, e a vista de paxaro, os diferentes recantos (a algúns é posíbel baixar, pero non doado) até que chegamos á punta da illa desde a que temos panorámicas da praia da Madalena e da ría. De volta no carreiro logo atopamos as escaleiras polas que se baixa á praia de Chamoso, recollida no cantil e protexida polas rochas puídas que aínda resisten a acción erosiva do mar. Na subida chegamos a unha estradiña pola que uns metros adiante atopamos, debaixo do feche da primeira parcela, un carreiriño que permite continuar camiñando preto da liña da costa até chegar a un punto onde nos impide un cerramento, pero camiñando preto del imos dar ao camiño que lle dá servizo a esas parcelas e por el subimos á estrada. Neste punto collemos á esquerda para baixarmos até o rego, que é o límite do concello. Antes de cruzalo temos un carreiro polo que podemos achegarnos aos restos do muíño de marea e a beira do mar. Para volver, o mellor é coller a estradiña que sae enfronte do carreiro polo que nos achegamos ao muíño e seguila, aínda non un quilómetro, até a estrada que vai a Ares e Mugardos. Alí collemos á dereita para camiñar uns 100 metros e tomamos un desvío á dereita por un camiño en baixada, co piso de cemento, que nuns 400 metros nos devolve á praia da Madalena, e camiñando polo piñeiral entre o que se atopan numerosas sobreiras, algunhas xa vellas e outras plantadas hai poucos anos, chegamos ao punto de partida.