As fontes do Sil

Afrontamos desta volta unha ruta longa na que podemos considerar dúas partes. A primeira, o achegamento en coche, que remontando o val do Sil, nos leva até La Cueta; e a segunda, o percorrido a pé até as fontes do río. Paraxe: Babia / Concello: Cabrillanes (León) / Percorrido; 16 km (ida e volta) / Dificultade: Media Para a primeira, saímos de Ponferrada para ir a Toreno e desde alí seguir a estrada que pasa por diferentes localidades que inclúen no seu topónimo o do río Sil ata chegar a Villablino. En Villablino, para seguir polo val do Sil, temos que ir á dereita cara a Laciana e a Piedrafita de Babia, onde collemos a estrada que sobe ao porto de Somiedo, unha estrada que deixamos en Vega de Viejos para continuar remontando o val e o curso do Sil ata La Cueta, a localidade máis próxima ás fontes, desde onde unha ruta sinalizada nos axuda a ir até as abas de Peña Orniz, onde se atopan as fontes máis afastadas, e máis altas, do río Sil. En La Cueta comezamos a camiñada baixando até a ponte e, desde alí, imos remontando o río polo camiño marcado con fitos de madeira -hai que fixarse para velos porque están bastante separados e nalgúns puntos podémolos perder-, ao tempo que iremos descubrindo e recoñecendo elementos de grande interese xeolóxico, especies vexetais propias das zonas calcarias e unhas paisaxes espectaculares. Neste traxecto, pola aba dos Picos Blancos, vemos de fronte a serra de La Mortera e o porto polo que se pode acceder ao Parque de Somiedo. Nesta parte do camiño hai un tempo, un curto tramo, no que se deixa de escoitar o río. Buscando o sitio e baixando á súa beira podemos ver como se perde entre as rochas para volver saír un pouco máis abaixo. Despois de cruzar a canle dun regueiro pasamos ao pé do refuxio de Bustusil. Un pouco máis adiante, para seguir o camiño das fontes do Sil, temos que ir á dereita, pasarmos pola mallada de Covalancho e seguir camiñando entre os paredóns da Mortera e Cuetalbo -que nos cumes marcan a linde entre León e Asturias, e o Sil, nos mapas arroio de Cebolledo- até o porto de Cuetalbo, desde onde se ve, á esquerda a Pena Orniz, e debaixo, os pasteiros onde se xuntan as augas de varias fontes para formar o primeiro Sil. E remontando o regueiro, un tramo con bastante desnivel, chegamos ao pé da Pena Orniz onde se atopan as fontes do Sil. A volta facémola polo mesmo camiño e se aínda temos tempo e gañas podemos subir ao alto de La Cueta para gozar das súas vistas. Durante o traxecto en coche podemos facer varias paradas para coñecer a contorna, mais non podemos deixar de facer un alto entre Piedrafita de Babia e Villaseca de Laciana para ver o profundo canón ("Tajo del Sil") que forma o río debaixo da ponte das "Palomas".