De András ao Faro das Lúas e a Lobeira

Unha camiñada non moi longa, pero con tramos en pendente, que se fai por pistas asfaltadas e terreñas, para visitar, en András (Vilanova de Arousa), dous miradoiros próximos na distancia mais coas súas particularidades: o Faro das Lúas, de creación recente, que tomou o nome e gañou interese pola colocación no seu cume dunha escultura creada en 2002 polo vilagarcián Manolo Chazo coa que se corou un antigo pedestal dos anos 50 do século pasado que non tiña aproveitamento; e o de Lobeira, o miradoiro tradicional da contorna, un pouco máis elevado, que se asenta nas rochas do cume máis sobresaínte dos arredores, no que en tempos ocupou un castelo do que aínda se poden apreciar algúns restos. Paraxe: O Salnés / Concello: Vilanova da Arousa / Percorrido: 7 km (ida e volta) / Dificultade: Baixa Desde eles podemos apreciar, cara ao mar, panorámicas de toda a ría de Arousa e máis alá, e cara ao interior, o Val do Salnés, os montes que o limitan, as poboacións que o ocupan e a riqueza agrícola e forestal que encerra. A ruta oficial, coñecida como Ruta dos Miradoiros, PRG-126, comeza ao pé do cemiterio de András, onde está o primeiro panel indicador e hai un pequeno sitio para deixar o coche (uns metros antes temos un amplo aparcadoiro ao pé da igrexa). Desde aí botamos a andar pola beira da estrada até que atopamos o primeiro desvío á dereita, estreito, asfaltado, que nos leva ás Casas do Monte. Na parte alta do lugar remata o asfalto e alí collemos a pista de terra que ten pola beira os indicadores do tendido do gas e seguímola ao longo dun quilómetro até chegarmos a un punto no que saen dela dous desvíos á dereita; aquí collemos o de máis á dereita, o máis amplo, e seguimos subindo uns 600 m para chegarmos a un alargo no que se atopa á esquerda unha entrada ao recinto do Faro das Lúas. Para continuar, baixamos, agora xa polo acceso principal, para saír do recinto e desviarnos á esquerda camiño do segundo miradoiro e para poder gozar do verde e da sombra que nos ofrece o que foi plantación de piñeiros arrasada pola vaga de lumes de 2006, convertida, grazas ao traballo dos comuneiros de András e aos 10.000 exemplares de especies frondosas que puxeron, nunha extensa e fermosa plantación de caducifolias autóctonas. Ao chegarmos á estrada imos á esquerda; a ruta oficial déixaa uns metros adiante para ir á esquerda por unha pista de terra, mais nós seguimos pola beira da estrada co que aforramos arredor dun quilómetro de percorrido. A volta podémola facer polo camiño de ida ou, se levamos un bo mapa de detalle ou coñecemos a contorna, por outros camiños con máis voltas para facer quilómetros e botar unhas horas ou pillar algún atallo, que os hai, para acortalo. Aos miradoiros tamén se pode acceder en coche.