A costa do Vicedo

Unha costa de cantís altos e recortados e varios seos, máis ou menos extensos e recollidos, polos que saen ao mar diferentes regos e onde se acumula a area que dá lugar a fermosas praias. Paraxe: Mariña Occidental / Concello: O Vicedo / Percorrido: 21,5 quilómetros (lineal) + paseos / Dificultade: Baixa É unha costa cun importante valor paisaxístico, xeolóxico e biolóxico, que está protexida nos LIC/ZEC e ZEPA Costa da Mariña Occidental. Neste tramo de litoral pódense atopar ecosistemas mariños areosos e rochosos, cantís, illotes, dunas e esteiros cunha gran diversidade de flora e fauna. A variedade e interese que ten este percorrido dá para facer varias rutas a pé, ou en bicicleta, aínda que hai lugares de acceso complicado, mais para un primeiro achegamento podemos percorrela en coche parando nos puntos de máis interese e acceso máis doado, desde os que tamén podemos facer curtos desprazamentos a pé. Comezamos na praia da Abrela, que se atopa ao abrigo de dous lugares sobresaíntes da contorna -as puntas do Cabalo (Viveiro) e O Fuciño de Porco- a onde chegamos desde Escourido (Viveiro) e, despois de vela, continuamos até o acceso ao Fuciño de Porco (a Fuciño de Porco só se pode acceder a pé, e son algo máis de 4 quilómetros ida e volta). Logo, pasado Suegos, collemos un desvío á dereita que nos leva ao Folgueiro, na estrada principal. Por ela, á dereita, seguimos até San Román, onde temos que coller un curto desvío á praia. Feita a visita, e de novo na estrada, logo atopamos á dereita o miradoiro de Moreiras, con vistas sobre a costa próxima e sobre a ría. Un pouco máis adiante temos que coller un desvío á dereita para achegarnos ao miradoiro do Toxoso camiño da praia de Xilloi. De Xilloi imos xa ao Vicedo para dirixirnos ao porto que ten ao seu carón a praia de Vidreiro e o paseo que permite achegarse á punta do Castro, onde está a Baliza, e seguir pola beira até a praia do Caolín (este traxecto tamén o podemos facer en coche, pero só hai que camiñar uns 800 metros ida e volta). A seguir, rodeando a praia do Vicedo, podemos achegarnos ao paseo e á praia dos Castelos. Saíndo do Vicedo temos un desvío á dereita, estrada sen saída, para achegarnos á praia de Area Longa e, máis adiante, un desvío á esquerda para ir ao areal de Chamadoiro, na desembocadura do Sor, que ten o aparcadoiro, pasando por debaixo da ponte da estrada, a só uns 300 metros da Cova que, se está a marea baixa, non podemos deixar de ver. Desde aquí conseguiremos tamén achegarnos a ver as pontes sobre o Sor.