13 anos e 17 razóns

Hai 13 anos, o 17 de maio de 2012, naceu en Compostela Sermos Galiza co número cero. Na capa, unha muller cun cartaz: "Eu + Galego". Nós Diario recolleu aquel testemuño e hoxe oferece 17 razóns para continuar a loita pola LINGUA.

1. Porque un medio en galego é VITAL para garantir a súa presenza social. 
2. Porque "Eu + un corazón + Galego" é aínda un lema vixente que simboliza a loita pola identidade e a cultura.
3. Porque o 13 representa futuro, perseveranza e resistencia. 
4. Porque manter vivo o idioma é unha tarefa diaria que require compromiso colectivo. 
5. Porque a perda de falantes débese a decisións políticas, non da cabalística do 13. 
6. Porque a Xunta ignora o problema.
7. Porque o sistema educativo debe garantir o galego como lingua vehicular. 
8. Porque a inmigración non é a causa da perda de falantes. 
9. Porque educar en galego tamén é integrar. 
10. Porque non precisamos leis que recortan dereitos.
11. Porque cada día do ano debe ser 17 de maio. 
12. Porque a nosa é unha lingua extensa e útil. 
13. Porque o galego representa horizonte e ciencia. 
14. Porque os medios públicos deben respectar a lingua propia. 
15. Porque falar galego non debe requirir valentía. 
16. Porque a infancia ten dereito a vivir en galego. 
17. Porque sen lingua, non hai país. 

O 13 é forza e rebeldía fértil. O 17, esperanza e renacemento. Nós Diario aporta as súas razóns. Poderían ser 13 veces 17. Dános as túas!