Novas elaboracións

Cando quero vivir digo Moraima No alto Salnés, nas abas do val, en Barro, leva anos Viña Moraima levando o nome do seu concello polo mundo. Agrupa un número reducido de viticultores en forma de cooperativa, nun modelo que acompañou o seu avance na calidade dos viños anada a anada, e novas elaboracións recuperando variedades como o caíño tinto e o ratiño. O seu albariño Moraima, con 5 meses de crianza sobre lías, procede de uvas de cepas vellas, de pequenas viñas en emparrado, algunhas centenarias e prefiloxéricas con pequena produción. Probalo sempre é unha experiencia grata. Moraima / 2021 / DO Rías Baixas / Viña Moraima / 13€ Tintos que falan ben de nós polo mundo Algueira é xa unha referencia internacional dos viños galegos. Paga a pena coñecer as súas apostas en brancos na Ribeira Sacra e en tintos de crianza con vocación de lonxevidade. Hai detrás anos de recuperación de viñas en socalcos nas beiras do Sil tapadas polo abandono, e de variedades de uva tapadas pola mencía. Tamén apostaron pola posta en valor da zona mediante experiencias enoturísticas na adega e na contorna. Fincas 2017 combina acios de caíño e sousón pisados a pé con crianzas ao redor dun ano en barricas de castiñeiro e carballo francés. Algueira Fincas / 2017 / DO Ribeira Sacra / Adega Algueira / 37,50€