Encantos do sur

Os encantos do noso sur Rosal e Condado son subzonas de Rías Baixas na xeografía vitivinícola oficial. Teñen o interese de conservar, con dificultade, a elaboración de tintos e brancos plurivarietais. Aquí non sempre o albariño está só. E non debería. Algunhas producións ofrécennos plurivarietais de interesante complexidade e equilibrio xa desde a viña. Bruña combina albariño, caíño branco, treixadura e loureira, que tamén coñecen como marqués. Un branco delicioso. Elegante e fresco. Un salto adiante prometedor neste novo proxecto vitivinícola. Novidades na revolución. Bruña 2021 / O Rosal fóra de DO / Sergio Álvarez e Roberto Bruña / 12,75€ Namorado da mítica tinta femia No val de Cela en Bueu cultivan secularmente a tinta femia. Nas adegas desas casas conseguen uns viños dunha sublime singularidade, loubados en cada furancho e mesmo na nosa literatura. Son tintos lixeiros e incisivos, expresivos e cantareiros, saborosos e finos. Antonio Portela decidiu poñerse a vogar entre as viñas incomparábeis do mar do Morrazo con esforzo, paixón e coñecemento. Nós namoramos este verán do seu rosado. Logradísima interpretación dun caíño costeiro que nos devolve aos ancestrais aromas e sabores roubados. Tan nosos e tan alleos. O Mare Namorado / Rose Femelle 2019 / Morrazo fóra de IXP / Antonio Portela / 25,50€