Persoal de Inditex protesta na Coruña para denunciar "recortes de dereitos"

Traballadoras de Inditex mobilizáronse na Coruña para denunciar "o recorte de maneira paulatina" na provincia de "dereitos consolidados desde hai moitos anos". Así o manifestou, en declaracións aos medios, a delegada de CIG en Stradivarius, Lucía Domínguez, durante a protesta que tivo lugar esta sexta feira fronte á tenda de Zara situada na rúa Juan Flórez.

"Os acordos que asinan aquí non os cumpren", denunciou para explicar que se debe á "política de centralización" das relacións laborais de Inditex "lonxe da Coruña". "Vai progresivamente recortando e incumprindo os acordos asinados".

"Aproveitan o afastamento da representación das traballadoras para deixarnos sen marxe de manobra, vivindo recortes de dereitos e de persoal", insistiu. Fíxoo tras soster que se pretende "non cubrir ningunha ausencia nin ningunha baixa".

A representante sindical reclamou que, polo menos, se cubran "parte" das ausencias co obxectivo de poder traballar "cunha garantía mínima de carga de traballo". Entre outras cuestións, a CIG denuncia que "se van endurecer as condicións das licenzas e outras medidas de flexibilidade horaria".

50 anos da primeira tenda Zara

Esta protesta, decorrida este 9 de maio, coincidiu co 50 aniversario da apertura da primeira tenda de Zara na Coruña. Amancio Ortega abriu o estabelecemento situado no número 64-66 da rúa Juan Flórez o 9 de maio de 1975. Naquel momento, Confeccións GOA levaba algo máis dunha década –desde 1963– producindo pezas de vestir.