Galiza rexistra 914 desempregados máis en febreiro, malia que mellora con respecto ao mesmo mes do ano anterior

Na Galiza, o paro rexistrado nas oficinas dos servizos públicos de emprego subiu en 914 persoas no mes de febreiro en relación co mes anterior (+0,79%), e aparece un 0,1% por riba da media do Estado español, sempre segundo os datos publicados este 3 de marzo polo Ministerio de Traballo e Economía Social. Desta forma, o total de desempregados na Galiza alcanza as 116.058 persoas, que son, con todo, 4.919 menos que nas mesmas datas de 2025, o que supón un descenso interanual do 4,07%.

En función do sector de actividade, a agricultura rexistrou 31 parados menos, a industria 11 menos e a construción cinco menos. Así, o incremento explícase polos 610 desempregados máis no sector servizos e polos 351 máis no colectivo sen emprego anterior. No referente á poboación estranxeira, o paro afecta a 11.609 persoas na Galiza, que son 425 máis ca en xaneiro (+3,8%) e 76 máis ca en febreiro de 2025 (+0,66%).

No relativo á contratación, en febreiro asináronse 48.406 contratos, 3.299 menos ca no primeiro mes do ano (-6,38%), pero 3.079 máis ca no mesmo período de 2025 (+6,79%). Deles, 16.333 foron indefinidos (-2,07% intermensual e +0,04% interanual) e 32.073 temporais (-8,43% intermensual e +10,6% interanual).

Datos do Estado español

No conxunto do Estado español, o paro rexistrado subiu en febreiro en 3.584 persoas respecto ao mes anterior (+0,1%), o maior incremento neste mes desde 2021, lastrado polo sector servizos e polo colectivo sen emprego anterior, composto maioritariamente por mozos e mozas na procura do seu primeiro traballo. Malia o aumento, o número total de desempregados situouse en 2.442.646 persoas, o nivel máis baixo nun mes de febreiro dos últimos 18 anos, segundo subliñou o Ministerio español.