A CIG propón que as prestacións e os subsidios por desemprego nunca sexan menores ao salario mínimo

Equiparar as prestacións contributivas mínimas e os subsidios por desemprego co salario mínimo interprofesional (SMI), así como situar este en 1.253 euros mensuais en 14 pagas, son algunhas das medidas que propuxo esta segunda feira a CIG "para garantir os dereitos das persoas que se atopan no paro". Sen acordo para a alza do salario mínimo: CCOO e UXT critican que o Ministerio asuma a proposta da patronal A central sindical, que compareceu en Vigo ante os medios de comunicación, alertou contra unhas reformas das prestacións e dos subsidios por desemprego que "incidirán na precarización". Ademais, o sindicato advertiu de que é "o momento" de acometer reformas legais e normativas que permitan "restituír dereitos" da clase traballadora. Máis en concreto, a CIG apostou por mellorar as contías das prestacións contributivas por desemprego, de maneira que nos primeiros 180 días de prestación se cobre 75% da base reguladora e a partir do 181, 65% desta mesma base. Ademais, en ningún caso, segundo a proposta da central sindical, a prestación ou o subsidio por desemprego podería ser inferior ao SMI. Por outra parte, a central sindical suxeriu a aprobación dunha Renda de Inserción Laboral e Social que substitúa o IMV (ingreso mínimo vital) e a RAI (renda activa de inserción) e que teña a contía do SMI para as persoas maiores de 18 anos que non cobren ningún tipo de prestación. A renda sería acompañada do seguimento dun itinerario persoal de orientación e formación profesional até a consecución dun posto de traballo no período máis breve posíbel. Neste sentido, a contía do SMI que propón a CIG (e polo tanto da renda de inserción, así como da cantidade mínima para as prestacións e os subsidios por desemprego) é de 1.253 euros mensuais en 14 pagas (o equivalente a 60% do salario medio do Estado español, tal e como recomenda a Carta Social Europea). González Sío di que o Consello de Europa corrobora os datos da CIG Segundo explica a Nós Diario o responsábel confederal de Negociación Colectiva da CIG, Francisco González Sío, "empregamos os datos do módulo salarial completo da Axencia Tributaria. O Consello de Europa certificounos que se trata do mesmo método que emprega Eurostat". O sindicato nacionalista tamén suxire a aprobación dunhas novas táboas na cotización no concepto desemprego que as empresas teñen que pagar nas nóminas. Así, na proposta da CIG, o tipo xeral de 5,5% só sería aplicábel á contratación indefinida a tempo completo, pasando a ser de 6,7% para o resto da contratación indefinida a tempo parcial e fixa descontinua. Á súa vez, o tipo actual de 6,7% para a contratación de duración determinada a tempo completo e parcial pasaría a ser de 7%. Carril defende que un contrato fixo descontinuo noN debería gozar de bonificacións "Queremos que só a contratación indefinida a tempo completo teña bonificación e que toda aquela que sexa doutro tipo pague máis á Seguridade Social, os contratos fixos descontinuos non deberían beneficiarse como se fosen indefinidos a tempo completo, que son os que queremos fomentar", afirma en conversa con Nós Diario o secretario xeral da CIG, Paulo Carril. A central sindical propón que as empresas que apliquen un Expediente de Regulación Temporal de Emprego (ERTE) de duración igual ou superior a 12 meses deban pagar 6% de cotización no concepto de desemprego durante os meses de vixencia do ERTE. Outra das medidas polas que aposta a CIG é que para as persoas traballadoras fixas descontinuas o subsidio por desemprego non exixa requisitos previos de tempo mínimo cotizado e que a duración sexa mínimo de seis meses. Ademais, a organización sindical propón a derrogación do actual indicador público de renda de efectos múltiples (Iprem) e recuperar o SMI como único indicador público de referencia do nivel de renda para determinar as contías de calquera tipo de prestación ou servizo público. Supresión das ETT na intermediación laboral A CIG aposta pola recuperación do papel dos servizos públicos de emprego para garantir o desenvolvemento das actuacións públicas dirixidas a favorecer un funcionamento que mellore a empregabilidade do conxunto da poboación activa e a inserción da poboación desempregada. Para isto, explicou o sindicato, "cómpre a dotación orzamentaria suficiente para dispor dos recursos, ferramentas e capital humano para poder realizar unha intermediación efectiva". Denuncian abusos das ETT en empresas do sector TIC Así mesmo, destacou a central sindical, "cómpre a derrogación das previsións contempladas na Lei de Emprego que permiten a privatización dalgunhas accións das políticas activas de emprego e nas materias asociadas". Neste sentido, solicitou mellorar o investimento nos servizos públicos de colocación para que poidan desenvolver correctamente o seu labor, así como suprimir o papel das empresas de traballo temporal (ETT) e das axencias privadas de colocación na intermediación laboral. Ademais, o sindicato demandou a transferencia á Galiza de todas as competencias pendentes para poder exercer todas as funcións en materia de xestión do traballo, o emprego, formación e recoñecemento de prestacións, así como a transferencia da formación para o emprego e o rescate público do sistema de formación para o emprego. Carril denuncia a imposición de medidas por parte da UE Paulo Carril, o secretario xeral da CIG, advertiu esta segunda feira que as reformas das prestacións e subsidios de desemprego nas que traballa o Executivo do Estado español son unha nova imposición da Unión Europea (UE) dentro do plan de axuste para acceder aos fondos Next Generation, polo que "suporán novos recortes de dereitos, xa que non se vai na dirección de mellorar o acceso, duración e contías das prestacións por desemprego para as persoas traballadoras". Paulo Carril, secretario xeral da CIG: "Non é que nos radicalicemos nós, é que os demais se dereitizan" "Polo tanto, non responden á necesidade de dotarse dun marco estratéxico que corrixa as inxustizas, as disfuncións e a ineficacia do sistema económico e laboral", senón que se tratan "dun complemento á Lei de Emprego, que segue sen dar resposta aos problemas de emprego nin solución aos problemas de ineficacia das actuais políticas activas de emprego, e que non prepara as políticas de emprego para os novos retos do mercado de traballo", afirmou. Precariedade O secretario xeral da CIG incidiu na importancia de aumentar a protección dos dereitos das persoas traballadoras, especialmente as desempregadas. "É urxente e necesario no contexto dunha realidade laboral cada vez máis marcada pola precariedade", concluíu o líder sindical.