Unha vintena de localidades mobilizaranse en defensa da Atención Primaria o 13 de abril
A plataforma 'PACs contra ou decretazo' confirmou esta sexta feira a súa participación nas concentracións convocadas pola Plataforma SOS Sanidade Pública.
Coincidindo co Día da Atención Primaria, que se conmemora cada 12 de abril, a Plataforma SOS Sanidade Pública da Galiza convoca todas as plataformas locais e comarcais en defensa da sanidade a mobilizarse por unha Atención Primaria digna e de calidade.
Segundo destacaron durante o chamamento, a situación que atravesa o primeiro nivel da sanidade pública galega é "dramática", malia "asas proclamas da Xunta". Segundo denunciou o portavoz da plataforma SOS Sanidade Pública, Manuel Martín, as esperas para acceder a unha consulta co persoal médico de familia alcanza os oito días e moitos centros de saúde non contan con persoal suficiente para atender as persoas doentes de forma presencial.
Tamén a poboación infantil paga as consecuencias da fata de especialistas, sinalou, "con 11.000 nenos e nenas galegas sen atención". O malestar entre profesionais e usuarias da sanidade pública vai en aumento, dixo Martín, polo que urxe a Administración galega mudar o modelo e dotalo de medios para unha atención de calidade.
Polo momento unha máis dunha vintena de localidades confirmaron xa a súa participación na xornada de mobilizacións que se desenvolverá de forma maioritaria a segunda feira 13 de abril.
Concentracións
- A Coruña, ás 11 horas no centro de saúde San Xosé.
- Baiona, ás 12 horas no centro de saúde de Baiona
- Cangas, ás 12 horas no centro de saúde de Cangas
- Catoira, ás 11.30 horas no centro de saúde de Catoira.
- Compostela, ás 11 horas no Centro de Saúde de Fontiñas.
- Ferrol, ás 19 horas no centro de saúde Fontenla Maristany.
- Gondomar, ás 12 horas no centro de saúde de Gondomar.
- Lugo, ás 12 horas no centro de saúde da praza de Ferrol.
- Marín, ás 20.30 horas no centro de saúde de Marín.
- Moaña, ás 12 horas diante da Casa do Mar.
- O Grove, ás 12 horas no centro de saúde do Grove.
- Ourense, ás 11.30 horas no centro de saúde Valle Inclán.
- Panxón, ás 12 horas no centro de saúde de Panxón.
- Pontevedra, ás 11 horas no centro de saúde Virxe Peregrina.
- Redondela, martes 14 de abril, ás 20 horas no centro de saúde de Redondela.
- Ribeira, ás 20 horas no centro de saúde de Ribeira.
- Sanxenxo, domingo 12 de abril, ás 12 horas no centro de saúde Baltar (Portonovo).
- Vigo, ás 11 horas no centro de saúde Olimpia Valencia.
- Viveiro, ás 11.30 horas no centro de saúde de Viveiro.
Aínda por confirmar a hora e o lugar concretos, tamén confirmaron a súa participación no chamamento lanzado pola Plataforma SOS Sanidade Pública as agrupacións locais e a veciñanza do Rosal e de Baio, no concello de Zas (Terra de Soneira).
PACs contra o decretazo
Por outra parte, a plataforma 'PACs contra ou decretazo' confirmou esta sexta feira a súa participación nas concentracións do 13 de abril. Sinalan que tanto a Atención Primaria como os Puntos de Atención Continuada (PAC) "comparten problemas estruturais" como a falta de persoal e o incremento da carga asistencial. Advirten que as medidas impulsadas para reorganizar estes servizos "poden agravar" a situación, "ao afectar tanto as condicións de traballo como á atención á cidadanía".
Consideran ademais que estas concentracións son unha oportunidade para facer visíbel o "malestar existente" e trasladar á administración a necesidade de adoptar medidas que "garantan unha atención sanitaria de calidade".