A exposición 'Pegadas para un tempo novo' mostra a historia do movemento LGBT+ na Galiza

Vigo acolleu esta 13 de novembro a inauguración da exposición Pegadas para un tempo novo, que contou coa presenza de Rosario Álvarez, presidenta do Consello da Cultura Galega (CCG); Daniela Ferrández, investigadora e comisaria da mostra, e Carme Adán, profesora de Filosofía e coordinadora do Centro de Documentación en Igualdade e Feminismos do CCG. A mostra trata da historia e a memoria das persoas que transgrediron os mandatos normativos con respecto ao xénero e a sexualidade.

A exposición é un percorrido que marca o camiño da igualdade, situándose nos anos inmediatos posteriores á morte do ditador Franco e chega até os principios da década dos noventa. Na exposición pódese ver desde o alto a diversidade dentro da diversidade, desde aquela que se organizou nos movementos de liberación homosexual, como a Coordinadora de Colectivos Gais da Galiza (CCGG), que convocou desde primeira manifestación até a que se agochaba en parques, escenarios e bares de ambiente para sobrevivir.

A exposición amosa ademais a faixa empregada na primeira manifestación do orgullo LGBT na Galiza, concretamente en 1981 en Vigo. Unha data na que da rúas da cidade olívica acolleron as consignas “Pola liberdade sexual” ou “Non á represión da homosexualidade”. As imaxes daquel momento, captadas polo avogado laboralista Xabier Mañón, tamén se poden verse na exposición Pegadas para un tempo novo.