Veciñanza do Saviñao xunta 500 sinaturas en menos de 24 horas contra unha planta de biogás

A veciñanza da parroquia de Vilaesteva, no Saviñao (Terra de Lemos) soubo a pasada semana que unha empresa estaba interesada en instalar unha central de biogás no lugar de Sanxumil, a escasos 200 metros das casas e a menos de un quilómetro do núcleo urbano de Currelos, onde hai unha escola e un centro de saúde, ademais doutras instalacións.

"Destes feitos somos coñecedores por casualidade, xa que a alcaldía, logo de presentarmos unhas preguntas por rexistro, nos informou sobre este tema que vai afectar as nosas vidas e os nosos cultivos", afirman nun comunicado desde a Asociación Veciñal de Vilaesteva.

Ademais de expresar a súa preocupación ao alcalde, Juan Carlos Armesto (PP), esta asociación abriu unha solicitude de sinaturas a través da páxina change.org e en 24 horas recolleron xa máis de 500 sinaturas, "tendo en conta que no noso concello, a poboación é maior e non está actualizada nas novas tecnoloxías", explican.

A seguir, iniciarán tamén a recollida de sinaturas tradicionais para presentar no Concello pedindo que se desestime este proxecto, ao igual que aconteceu noutros lugares onde se proxectaban plantas de biogás, como é o caso de Coeses, Lugo, ou en Antas de Ulla (A Ulloa).

“Unha central de biogás só trae cheiros e contaminación ao noso concello. Véndese como a solución ao problema dos gandeiros e das gandeiras, mais en realidade van traer lodos de depuradora e lodos industriais. Camións cheos de lixo pasando polas nosas xa deterioradas estradas a diario e por diante das nosas casas”, denuncia a asociación.

“Realizaremos tantas accións como sexan necesarias para que non se instale unha planta de biogás perto das vivendas”, conclúe.