Sobrecarga laboral e días sen cobrar, as críticas do persoal de Amazon na Galiza

A folga desta semana do persoal de Amazon nas instalacións que ten a multinacional norteamericana no Porriño (comarca de Vigo) puxo de actualidade o seu modelo de negocio. A compañía propiedade do multimillonario Jeff Bezos ten no xigante do comercio dixital un dos seus principais activos e, desde a apertura dese centro loxístico na comarca de Vigo, incide en maior medida no comercio local. Para o economista e colaborador de Nós Diario, Xabier Pérez Davila, os extraordinarios beneficios que consegue Amazon a nivel mundial (en 2024 uns 56.999 millóns de euros, 94,7% máis que no exercicio anterior, segundo a propia compañía) proceden de “explotar os traballadores e as traballadoras dos almacéns e tamén o persoal condutor que forma parte da loxística” e tamén dunha continuada “extracción de rendas das empresas que se ven obrigadas agora mesmo a distribuír os seus produtos en Amazon". Pon como exemplo que a multinacional recibiu denuncias nos Estados Unidos de América (EUA) por cobrar comisións dun mínimo de 30%. Neste caso, un informe de 2020 do Congreso dos EUA estimaba en 2,3 millóns as empresas que distribuían os seus produtos a través de Amazon e 850.000 delas tíñano como única fonte de ingresos. Caída global de Amazon Web Services: estas son as plataformas afectadas Precariedade e alta carga de traballo Amazon conta con dous grandes centros loxísticos na Galiza. O primeiro abriu as súas portas no Porriño en 2019 e o segundo na localidade de Cambre (comarca da Coruña) en 2024. Cada un deles, segundo a propia empresa, distribúe ao redor de 15.000 paquetes cada día (30.000 en datas sinaladas como no Black Friday) e mantén abertas as instalacións 24 horas todos os días do ano coa excepción do 25 de decembro e o 1 e o 6 de xaneiro. O 23 de decembro o persoal do almacén da multinacional do Porriño secundou unha folga (con 100% de seguimento, segundo a CIG, a central sindical maioritaria na planta) en protesta polas condicións pola súa precariedade salarial e as “duras” condicións de traballo que teñen que aturar. Ese día tiñan para distribuír 18.000 paquetes. Denuncian “a falta de persoal suficiente e os elevados ritmos que teñen que soportar para poder sacar adiante a carga laboral”, como indica o responsábel de Transporte da CIG de Vigo, Carlos Lamosa. En segundo lugar, suma "a precariedade na contratación (case todos os contratos actuais son a tempo parcial ou de fixos-descontinuos), incumprimentos en prevención de riscos ou o feito de ter que traballar en domingos sen remuneración nin compensación de ningún tipo”. Alén diso, denuncia o modelo de explotación “que fai parte tamén da masiva externalización da actividade, coa contratación de numerosas empresas de traballo temporal para realizar traballo dentro do propio almacén e a subcontratación do reparto en empresas externas ou a través de persoal autónomo”. Pontón aposta por un "Amazon galego" para o comercio local Agardan reunirse coa dirección da empresa a finais de xaneiro e, en función do que aconteza, podería haber novas mobilizacións e folgas porque “o persoal non vai renunciar aos dereitos que lle pertencen e continuará loitando até que Amazon atenda as súas lexítimas demandas”. Competencia no comercio A aparición de Amazon na Galiza introduciu unha nova maneira de mercar, a dixital, allea ao comercio tradicional. "É outra competencia máis que lle chega, sobre todo ao pequeno comercio, e que se suma á que xa tiñan das grandes superficies", considera Xabier Pérez Davila. Esta situación preocupa no ámbito político. O BNG propuxo en xuño de 2020, coa pandemia da Covid-19, "crear un Amazon galego" coa intención de frear a sangría de feches de comercios posto que "nada lle importa á multinacional a viabilidade dunha tenda de barrio galega". En abril deste ano, o daquela conselleiro de Emprego, Comercio e Emigración, José González, dicía que Amazon era "o inimigo" do comercio local galego por "crear pouco" traballo e usar os comercios locais "para que sexan os seus almacéns". Porén, o mes pasado o presidente da Xunta da Galiza, Alfonso Rueda, asinou con Web Service España (compañía de Amazon) un convenio para impulsar a formación en novas tecnoloxías na FP. Desde o comercio local galego, para defenderse, abriron unha plataforma dixital propia denominada ComercioGalicia. A iniciativa partiu da Federación Galega de Comercio e está aberta as 24 horas. Neste sentido, e a modo de conclusión, Pérez Davila cre que con urxencia "debería intervir a Unión Europea se quere optar por unha soberanía no ámbito tecnolóxico". Maioría absoluta da CIG no comité de Amazon no Porriño Jeff Bezos, máis alá do negocio de distribuír "O modelo de negocio de Jeff Bezos non só se queda en Amazon, tamén entra noutros sectores", afirma a Nós Diario Xabier Pérez Davila. Así, o economista destaca as súas firmas que traballan no mundo de internet "como Amazon Web Services (AWS), que ofrece plataformas de computación na nube baixo demanda a particulares, empresas e Gobernos". Esta empresa, á súa vez, adquiriu varias compañías, como stream Twitch, o software de asistencia dixital Alexa, a produtora de cinema e televisión Metro-Goldwyn-Mayer (MGM, que se complementa coa plataforma de vídeo Prime Vídeo, do mesmo grupo), o portal IMDb e o servizo de podcasts e audiolibros Audible, entre outras compañías. Alén de internet, Bezos é propietario desde o ano 2000 da empresa de transporte aeroespacial Blue Origin e desde 2005 do portafolio de investimentos Bezos Expeditions.