A sanidade galega sitúase á cola do Estado e da Unión Europea en profesionais de enfermaría

Galiza rexistra das peores ratios do Estado en dotacións de enfermaría. Segundo os datos recollidos no último Informe de Recursos Humanos da Enfermaría, elaborado polo Consello Xeral da Enfermaría e con cifras referidas a 2021, o país dispón de 517 profesionais por cada 100.000 habitantes. Neste sentido, as peores cifras rexístraas a provincia de Pontevedra con 402 enfermeiras por cada 100.000 habitantes e as mellores a de Lugo con 705 enfermeiras por cada 100.000 habitantes. Os números da Galiza non resisten comparación co conxunto estatal. Neste sentido, só presenta uns resultados máis negativos Murcia con 463 profesionais por cada 100.000 habitantes, colocándose nos postos de cabeza Nafarroa con 926 enfermeiras por cada 100.000 habitantes, Euskadi con 797 enfermeiras por cada 100.000 habitantes e Melilla con 778 enfermeiras por cada 100.000 habitantes. Así as cousas, a Galiza fica moi lonxe da media do Estado, situada en 572 enfermeiras por cada 100.000 habitantes. Enfermeiras vense na obriga de enviar fotos para receitar antibióticos pola falta de persoal Galiza non cumpre coas recomendacións da OMS Ademais, as ratios de persoal de enfermaría atópanse moi por baixo da media comunitaria e das recomendacións da Organización Mundial da Saúde (OMS). Galiza precisaría de 8.351 enfermeiras e enfermeiros máis para se situar na media dos Estados da Unión Europea (UE), de 10.614 enfermeiras máis para cumprir coas cifras esixidas pola OMS e de 7.678 enfermeiras máis para colocarse nos niveis dos países da Organización para a Cooperación e Desenvolvemento Económico (OCDE). Así mesmo, mantén unha fenda moi importante coas nacións europeas da súa contorna, rexistrando unha gran diferenza con Portugal, que conta con 675 enfermeiras por cada 100.000 habitantes. Os datos do último exercicio son peores que os da anualidade anterior. Así, en 2020, Galiza contaba con 519 profesionais por cada 100.000 habitantes, fronte a 602 do conxunto estatal. Ao tempo, rexistraban ratios inferiores Murcia con 459 enfermeiras por cada 100.000 habitantes e Andalucía con 500 enfermeiras por cada 100.000 habitantes. Precisamente esta última comunidade superou a Galiza en 2021, marcando un rexistro para ese ano de 529 enfermeiras por cada 100.000 habitantes. O Sergas sanciona o enfermeiro e divulgador Héctor Castiñeira despois de afirmar que asinou "máis de 500 contratos en 14 anos" Un persoal envellecido As perspectivas de futuro non son mellores. A este respecto, a idade media do colectivo é moi elevada, o que avanza a xubilación dunha parte importante do mesmo nos próximos anos. Neste sentido, os datos procedentes do Servizo Galego de Saúde (Sergas) apuntan que 9,8% das profesionais da enfermaría superan 65 anos de idade, con tres nos 70 anos; 65 na faixa de 69 a 66 anos e 160 nos 65 anos. Ademais, 15,3% atópase no grupo de idade de entre 63 e 64 anos, con 162 profesionais nos 64 e 193 en 63 anos. A fuga de persoal de enfermaría formado na Galiza cara a outros territorios do Estado e Europa é constante. Neste sentido, a presidenta da Asociación Galega de Enfermaría Familiar e Comunitaria (Agefec), Genma Rodríguez, lembra a Nós Diario que “nun estudo elaborado pola nosa asociación en 2022 recóllese que 22,2% das profesionais inscritas nas bolsas de emprego de enfermaría de familia e comunitaria do Sergas desenvolven a súa actividade fóra da Galiza”. Genma Rodríguez explica esta situación como consecuencia “da ausencia de estabilidade laboral na sanidade galega”. Nesta liña, indica que “cunha especialización en enfermaría familiar e comunitaria en Asturias fanche un contrato como interina cando aquí te obrigan a rotar por diferentes servizos, en moitos casos fóra da propia Atención Primaria, vinculándonos a un hospital”. Unhas posibilidades análogas ás de Asturias ofrécense en territorios como Euskadi, destino de moitas profesionais formadas na Galiza. Un 20% das enfermeiras de familia traballan fóra da Galiza A fuga das sanitarias fóra da Galiza As cifras son aínda máis problemáticas na enfermaría xeral. Nesta liña, a voceira de Enfermeiras Eventuais en Loita, Silvana Muñoz, comenta a este xornal que “arredor de 65% das enfermeiras anotadas nas listas do Sergas da área sanitaria da Coruña traballan fóra da Galiza ou na sanidade privada”. Nesta dirección, nega que non haxa persoal titulado para exercer a enfermaría e afirma que “hai xente, pero aquí non se aguanta pola falta de estabilidade e de perspectivas de futuro e a xente vaise fóra”. O secretario nacional da CIG-Saúde, Manuel González Moreira sinala a Nós Diario que “as profesionais que se forman aquí marchan porque as condicións de traballo que lles ofrecen non son atractivas, ao non garantir a estabilidade do persoal”. A este respecto, considera urxente elaborar unha “análise da situación en cada servizo e unidade de Atención Primaria para coñecer o número de profesionais, de cada categoría, que é necesario para lograr as ratios a aplicar nas carteiras de servizo desenvolvidas no Consello Técnico”. A poboación galega é a que menos confía na sanidade privada: un 16,6% asinou un seguro A falta de estabilidade deixa o país sen enfermeiras Os profesionais consultados por Nós Diario coinciden en sinalar que a solución á falta de persoal en enfermaría pasa por garantir a estabilidade laboral ao colectivo. A este respecto, Silvana Muñoz lembra que agardou “19 anos para conseguir unha vacante na sanidade pública” e reclama para aumentar as dotacións de enfermaría na Galiza “darlle á xente boas condicións de traballo, con contratos, cando menos, a seis meses vista e favorecer a estabilidade”. As demandas de Silvana Muñoz son partilladas por Genma Rodríguez e Manuel González. Así, a primeira esixe “estabilidade laboral, porque coas condicións actuais é imposíbel organizar e planificar a vida a un prazo de 15 días”. González solicita “condicións de traballo que garantan a estabilidade” e denuncia que “as Ofertas Públicas de Emprego (OPE) da Consellaría de Sanidade non resolven o problema”. O dirixente da CIG reivindica que “as ratios entre profesionais da Medicina de Familia e da enfermería sexan, como mínimo, de unha facultativa por unha enfermeira”. A voceira de Enfermeiras Eventuais en Loita ve “insuficientes as ofertas recollidas nas OPE" e sinala que “as prazas ofrecidas na última non chegan para cubrir as necesidades da área sanitaria da Coruña”.